Tematiak berean

Ez dute amore ematen Nafarroako Auzitegiko epaile batzuek 2016ko sanferminetan neska bati, kritika gogorrak jaso zituen sententziaren arabera,«taldekako sexu abusua egiteagatik» kondenatutakoen auzian. Arrazoi du defentsako abokatuak esaten duenean epaile horiek«kontsekuenteak» direla aurretik hartutako erabakiarekin: okerra egin zuten orduan, eta okerra egiten segitzen dute.
Askotan eztabaidatu da, salatu ere bai, Espainian, kasu batzuetan, abusua gertatzen dela behin-behineko espetxeratzearekin; maizegi erabiltzen dela, horretarako arrazoirik ez dagoenean. Espainiako Barne ministro eta magistratu ohi Grande-Marlaskak berak esan zuen irailean egindako elkarrizketa batean, oso kasu berezietan erabili behar zela bakarrik.
Epaiketa aurreko behin-behineko espetxeratzea gertatzen denean gertatzen da abusu hori, baina sanferminetako auzia oso bestelakoa da. Kasu horretan, zigorraren ondorengo behin-behineko espetxeratzeaz ari gara, epaiketa egin zelako eta magistratuek zigorra ezarri zietelako lehen akusatuak eta orain zigortuak direnei. Handia da aldea, epaiketa aurreko eta ondorengo behin-behineko espetxeratzeen artean bederatzi urteko zigor bat dagoelako, nahiko arrazoia izango beharko lukeena zigortuek Espainiako Gorenaren azken erabakia kartzelan entzuteko.