Txepe Lara ekoizleak Zinemira saria jaso du

Jose Maria Txepe Larak Zinemira saria jaso zuen atzo, Viktoria Eugenia antzokian egindako Euskal Zinemaren Galan. Zinemaldiak eta Ibaia eta EPE ekoizle-elkarteek euskal zinemaren pertsonaia nabarmen baten ibilbidea aintzat hartzeko ematen dute ohorezko sari hori, eta aurretik Imanol Uribek,Alex Angulok, Elias Kerejetak, Michel Gaztanbidek, Juanba Berasategik, Pedro Oleak, Karmele Solerrek, Ramon Bareak, Julia Juanizek eta Ramon Agirrek jaso dute. 1987an sortu zuen Jose Maria Larak P.C ekoiztetxea, eta orduz geroztik hainbat film ekoitzi ditu: Arantxa Lazkanoren Urte ilunak, Ramon Barearen Pecata Minuta, eta Telmo Esnal eta Asier Altunaren Aupa Etxebeste!, besteak beste. Hain zuzen ere, azken horren jarraipena estreinatu zuten atzoko galan: Agur, Etxebeste!.