Albistea entzun

HIRUDIA

Irakurle zaharraren balada

Juan Luis Zabala - Idazlea

2018ko martxoak 22

Ez hadi nirekin haserretu, maitea, ulertu behar dun nire egoera eta nire ezina, barkabera izan hadi, mesedez. Nahiko niken nik garai batean bezain lotuta egon hirekin. Ez ditinat inondik ere ahaztuak hire magalean babestuta, beste gose-egarririk gabe, emandako gauak eta egunak. Edozer emango niken orduko bizitasunez sentitzeagatik bihotzaren taupada ezin bezatuak hirekiko igurtzi epelean. Ez litzaidaken axola izango orduan bezain inozo, ero eta are ergel ere agertzea besteen begietara, orduan bezain galdua izatea probetxuzko bizitza ordenatuaren partida lehorra.

Baina ezin dinat, maitea, ezin dinat dagoeneko, ezin zaion eskatu bailarara ibai eginda iritsitako errekari mendian izan zuen indar basa bulartsuari eusteko, eta neu ere halatsu naun eta halatsu nagon orain hirekiko eta hire indar beti bizi, beti misteriotsu eta beti miretsiarekiko. Ez dun gure arteko harremana sekula lehengoratuko. Ez ditun enara ilunak bueltatuko, ez ditun antzinako elurrak bihurtuko, ez dun Martin Larralde itzuliko.

Batetik, ondotxo dakin, inork ez baitu hori hik bezain maiz eta aberats milaka moldetan adierazi, bizialdiaren aitzineratzeak pasioak oro dituela baretzen eta epeltzen, guztiz suntsitu eta desagerrarazi gabe bada ere. Bestetik, ez zaidan haizu egunaren orduak nahierara enplegatzea, bahitua zaukanat denboraren ondasun preziatua, hire beste betiko gai bati lotutako mendekotasunak hartaratua, bizi beharrarenak, diruarenak azken prosaiko batean.

Baina ez dun hori guztia, besterik ere badun tartean, eta zintzo dinat aitortuko, behin gisa honetako konfidentzietan hasiak garenez gero, ahalik eta modurik argienean. Eguneroko betebeharren katetik askatu ondoren, hiregana naraman bidea hartzeko asmoari lotzen natzaion orduko, maite ezin ahaztua, maite ezin traizionatua, maite ezin abandonatua, beste maitale batzuen deiek erakartzen eta aztoratzen naiten, gero eta inguratuago eta setiatuago gauzkaten askotariko pantailetatik zirika. Maitale eskasak ditun hire aldean, arnasa azkar, estu eta baldarrekoak, txinparta huts onenean eta kasurik gehienetan ezta hori ere, bakarka hartuta ezdeusak eta inori kalte egiteko ahalmenik batere gabeak, baina denak batera, mordoan, saldoan, trumilka, egunero eta ia ordu oro erasotzen didaten moduan, asmorik zintzoenen galgarri izateko gauza, giza burmuinak irudika lezakeen inurri-izurriterik beldurgarrienaren antzera. Ez dinat hemen izenik aipatuko, badakin eta zertaz ari naizen. Bakarrik esango dinat azken urteetan etenik gabe ari direla ugaritzen gure arteko lotura-igurtzien etsai nano horiek, eta ia-ia duela hamarkada batzuk autoa sartu zen bezain indartsu sartu direla dagoeneko gure bizitzetan, eta betiko, itxura guztien arabera. Ez dun jeloskortasun kontua, bazakinat eta ez haizela inoiz jeloskorra izan, are gutxiago hain maitale eskasen. Baina ezin ukatua dun hiretzako dudan denbora, gogo eta kemen lehendik ere nahi baino mehetu eta mendratua are mehetzenago eta mendratzenago didala piztia nimiño horien pausarik gabeko eraso petralak.

Hala ere, maite haut eta beti maiteko haut, beti izango dinat hire arnasaren premia, eta ez haut inoiz ez ahaztuko ez traizionatuko ez abandonatuko, eta, behiala bezain sarri ez bada ere, eta batez ere behiala bezain larri ez bada ere, noiznahi eta beti joko dinat hiregana, hire mila formetako edozeinetara, unearen eta aldartearen araberako hautuan, luze zein labur, serio zein irrigarri, leun zein zakar, azaleko zein sakon, arin zein motel, bertako zein arrotz, gogaide zein beste muturreko, etsaitasunean ere beti lagun, zatarrean ere beti eder, itxian ere beti ireki, lotuan ere beti libre, libre beti, beti, beti.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Manuel Asin Ikuspuntu jaialdiko zuzendari artistikoa, Baluarteko atarian, Iruñean. ©JAGOBA MANTEROLA / FOKU

Ikertzeko balio duten distantziak

Olaia L. Garaialde

Iruñeko XVI. Ikuspuntu jaialdia martxoaren 14tik 19ra izanen da. Sail Ofizialean hamazazpi herrialdetako 21 film izango dira lehian. Lan eta Desbordamientos sail berriak ere badira

 ©BERRIA

Lukiek, eskemak nondik eta noraino apurtu

Itziar Ugarte Irizar

 

Hamar kantuko disko berria plazaratu du taldeak: '#2'. Kontraste ugariko lana ondu dute, egitura ezohikoak eta pasarte poperoagoak uztartuta. Arrasaten joko dute gaur; bihar, Tolosan

Juan Mari Aburto eta Fernando Perez, atzo, Azkuna zentroan. ©ARITZ LOIOLA / FOKU

Bost erakusketa egongo dira ikusgai aurten Bilboko Azkuna zentroan

Olatz Enzunza Mallona

Erakusketez gainera, beste 200 jarduera baino gehiago programatu dituzte, eta arte bisualak indartzea izango du ardatzetako bat zentroak

Carla Simonen 'Alcarràs' filma. ©Berlinale

Claire Denis, Hong Sang-soo, Isaki Lacuesta eta Carla Simon, Urrezko Hartza eskuratzeko lehian

Andoni Imaz

Berlinalen, besteak beste, Mitra Farahani, Lucrecia Martel, Ulrich Seidl eta Peter Strickland zinemagileen lan berriak erakutsiko dituzte.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.