Rakel Lopezen hiltzaileari zigor iraunkorra jarri diote

Eibarren jaiotako andrearen eta haren semearen hilketaren harira epaitu du Madrilgo Probintzia Auzitegiak; bikote erlazioa zuen andrazkoarekin

Arantxa Iraola -

2019ko azaroak 7
Rakel Lopez Airas eta haren semea hilotz agertu ziren 2017ko maiatzaren 2an. 44 urte zituen andrazkoak —Eibarkoa zen sortzez (Gipuzkoa)—, eta 12 haren semeak. Labanaz egindako zauriak zituzten biek. Alcobendasen (Madril) agertu ziren, beren etxean. Emakumearen senarrak senide bati aitortu zion berak hil zituela biak, baina ezkutatu egin zen, eta Poliziak hilabete geroago atxilotu zuen azkenean. Atzo jakin zen espetxealdi iraunkor berrikusgarria ezarri diotela gizonari.

Madrilgo Probintzia Auzitegian epaitu dute. Sententziaren arabera, ahaidetasunaren eta «genero motiboek bultzatuta» jardutearen larrigarriak ezarri behar zaizkio auzipetuari, eta aintzakotzat hartu dituzte zigorra ebaztean. 25 urteko kartzela zigorra ezarri diote andrearen hilketarengatik; zigor iraunkor berrikusgarria haren semearenarengatik.

Herri akusazio moduan parte hartu du auzibidean Eibarko Udalak, eta Mikel de los Toyos alkateak adierazi du begi onez hartu dutela ebazpena. «Egoerak eragindako minak ez du atzera-bueltarik, baina justizia egin da». Espetxe zigor mota hori 2015ean onartu zuten Espainian, besteak beste adingabeen hilketa kasuetarako. Behin ezarri dute orain arte Euskal Herrian; 2016ko urtarrilean Gasteizen Alicia izeneko 17 hilabeteko ume bat hil zuen gizonarentzat izan zen. Arabako Auzitegiak ezarri zion zigorra, eta EAEko Justizia Auzitegi Nagusiak berretsi egin zuen gero. Umearen ama hiltzen ere saiatu zen gizona.

Bestalde, larunbatean Baionan hilotz agertu zen emaztea hiltzea leporatuta atxilotuta dagoen gizonezkoak gaur deklaratuko du epailearen aurrean. Gizonak berak hots egin zion Poliziari, bikotekidea hilda aurkitu zuela esanez; andreak ubelduak zituen. Aurrekariak ditu bortxa matxistarekin lotutako delituengatik. Lapurdin aurten gertatu den hirugarren hilketa matxista da. Euskal Herriko Emakumeen Mundu Martxak Baionako Herriko Etxearen aitzinean elkarretaratze bat eginen du gaur.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna