Errusiako Munduko Kopa. GORROTO DUZUN HORI

Kontzeptuak

Julen Gabiria -

2018ko ekainak 26
Ia konbentzituta geundenerako futbola futbola baino ez dela, hara non munduko herrialderik baketsuena agertu den titularretan, gerra-danborrak astinduz. 12 jatorritako jokalariak biltzen ditu Suitzako selekzioak; horietako batzuk, zinez ibilera gogorrak bizitakoak. Horien artean daude Granit Xhaka eta Xherdan Shaqiri: lehenengoa, Suitzan jaioa baina guraso albaniar-kosovarrak dituena; bigarrena, Kosovon bertan jaioa. Bien familiek egin zuten ihes Jugoslavia ohiko gerratik, eta halaxe heldu Suitzara.

Bada, joan den ostiralean, zer eta Suitza-Serbia partida. Barruan zerbait piztuko zitzaien bi mutilei, amorruren bat edo indar bereziren bat, eta esaiezu orain ezetz, futbola futbola baino ez dela, ez dagoela patioko jolas hau politikarekin nahasterik. Kasualitatea balitz, tira; baina kasualitate handiegia ez ote den Serbiak bosgarren minutuan gola sartzea, eta ondoren Suitzak markagailua iraultzea, hain justu bi futbolari horien golei esker. Garaipenaren gola, gainera, azken minutuan sartuta. Hori gutxi ez, eta arranoaren ikurra egin zuten biek, bakoitzak bere gola ospatzeko, arranoa baita Albaniako banderan agertzen den irudia. Eta FIFAk zigor-prozedura jarri die, bi kontzeptuak nahasteagatik.

F taldean, berriz, Hego Korea. Selekzio horretako izarra, Heung-Min Son, negarrez hasi zen joan den larunbatean, Mexikoren aurka jokatu eta galdu ostean: Hego Korea ez bazen final-zortzirenetarako sailkatzen, eta dagoeneko ez da sailkatuko, bi urteko soldadutza egin beharko du derrigorrez Sonek, eta baliteke bere kirol-ibilbideari ere agur esan behar izatea. Soldadutza, baina, ez da politika. Eta ez diote isunik jarriko negar egiteagatik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna