DARWIN ETA GU

Greta Etxebarrieta

Jose Mari Pastor -

2019ko urriak 12

Ez dio ardura non sortu zen: Bilbon, Gasteizen, Tolosan edo Ortzaizen; ikastolara edo eskola publikora doan; euskalduna, erdalduna edo eurdalduna den. Noiz jaio zen da inportanteena: duela 11, 14, 16 edo 20 urte. Odol berria du. Eta edozein izen izan dezake: Naiara, Jennyfer, Fatima, Laida, Garazi... edo Greta. Greta Etxebarrieta.

Lurraren etorkizunak kezkatzen du Greta. Klima larrialdia eragin duten politika, erabaki eta jokaerak kritikatzen dituzte, harekin batera, munduko ume, nerabe eta gazteek. Borroka horrek batzen eta mugiarazten ditu, beste kontu batzuek ez bezala. Etorkizunean ohiko politikagintzari lotuko zaizkio gazteak arazoari aurre egiteko ala beste bide bati ekingo diote?

Greta Thunberg dugu haien erreferentzia. Neska suediarra ez da sobera fidatzen politikariez. Nola eragingo dio gure politikari Thunbergek munduan barrena bultzatutako mugimenduak? Pentsatu zer gertatuko litzatekeen datorren urteko bozetan 18 urteko neska batek zerrenda gretista bat aurkeztuko balu. Seguruena, lehen aldiz ilusio handiz bozkatuko luketen hainbat gazteren botoak lortuko lituzke. Lagun batek esan zidan lehengoan: «Konturatu da ezker abertzalea mugimendu horrek zer ondorio izan dezakeen etorkizunean? Pentsatu du nola kudeatu?».

Nola ikusten dute fenomenoa indar abertzaleek eta, bereziki, ezker independentistak? Hamaika datu eta ikerketa zientifikok frogatu dute planeta pikutara doala, orain arte bezala segituz gero. Kezka, beraz, erabat justifikatuta dago. Eta borroka ere bai. Alta, non geratuko da euskal agenda Lurraren agendaren barruan? Nola erakarri kaleetan planeta bakarra dugula gogorarazten diguten gazteak? Izan ere, erakartzen ez ditugunak Espainiaren edo Frantziaren agendan kokatuko dira, nahita edo inertziaz. Eta mundu mailako botere unibertsal bateratu igualitario desiragarri (ia) utopikoa lortu artean, bi estatu horiek diseinatutako esparru erabakitzaile eta erreferentzialean jardungo dute.

Nola bateratu, bada, Lurraren aldeko borroka eta herrien aldarrikapen nazionalak? Arriskua badago, eta ez edonolakoa: planetaren aldeko erronkak Euskal Herriaren hil ala biziko borroka ezabatzea, oraingo statu quo-ari eutsiko badio. Lurra da inportanteena, eta Euskal Herria hutsaren hurrena da planetan. Hortaz, Greta Etxebarrieta klima aldaketaren kontrako borroka ez armatuaren lehen ikonoa izango dugu. Beste guztia iragana izango da. Eta gure bi estatu nagusien inposizioa legitimatzea ekarriko du.

Klima larrialdiari aurre egiteko borroka transbertsala da. Aldarrikapen bakarretakoa izango da, PP edo Ciudadanosen inguruko familien seme-alabak eta euskal independentisten umeak batuko dituena. Hortik kanpo, lotura gutxi. Eta hor desabantailan gaude. Greta Etxebarrieta eta bere lagunak Lurraren salbazioaren alde kaleratuko dira erraz, baina ez da hain seguru autodeterminazioaren alde egingo ote duten.

Ume espainiar batek lasai asko esan dezake etxean: «Nik ez dut Espainia maite; nik Lurra maite dut». Gurasoek kritikatu edo txalotu egingo dute, baina horrek ez dio ardura. Umeak maitatu ez arren, Espainia hor dago, eginda. Espainiak ez du salbaziorik behar. Espainia salbatuta dago. Salbatuta eta babestuta. Indarkeriaren bidez, beste modurik ez badago. Horixe gogoraraziko digute gaur, hispanitatearen egunean, erregeak, presidenteak, armadak, Guardia Zibilak eta bestek. Eta Euskal Herria?

Ilobaren alabari buruzko pasadizoa azaldu dit lankide batek. Haren urtebetetzea zetorrela eta, zer opari nahi zuen galdetu zion. Umeak ez zuen dudarik egin: arrain bat. Animaliek libreak izan behar dutela esan zion lankideak, bestela hil egiten dira eta. Haurrak bizkor erantzun zion: «Nire arraina itsasoan hilko da, arrainontzian ez. Arrainontzian ez du plastikorik jango». Neskatoak sei urte bete zituen joan den astean. Oraindik ez daki oso modu kontzientean euskalduna izatea zer den, baina argi du arraina seguruago dagoela arrainontzian itsasoan baino.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Txagorritxuko erietxean, COVIDaren test serologikoak aztertzen. ©G. RUBIO / FOKU

Eritasunari buruzko lezio berrikusia

Arantxa Iraola

Asko falta da oraino, baina COVID-19aren inguruko ezagutzak egunero ari dira argitzen, osatzen; ondorioz, izurriaren hasieran gaitzaz esan ziren hainbat gauza zahartuta eta atzeratuta geratu dira guztiz. Etengabeko berrikusketa eskatzen du gai honek.

Langile bat, Garesen, piperra biltzen iaz. ©Jesus Diges / efe

Nafarroan, PCR probak egingo dizkiete sasoikako langileei

Joxerra Senar

Abuztutik urrira bitartean, ardorako mahats bilketan edo bestelako barazki eta fruituen uzta bilketarako Nafarroaz kanpotik etorriko diren langileei probak egingo dizkiete, etan positibo emanez gero, konfinamenduan lagunduko die gobernuak.

Basurtun, PCR probak egiten ©Javier Zorrila / efe

300 positibotik gora Hego Euskal Herrian

Berria

Bizkaian eta Araban gorakada nabarmenak izan dira.

Pentsionisten elkarretaratzea Bilboko Justizia Jauregian. ©Aritz Loiola

Pentsiodunek pandemiako testigantzen txosten bat aurkeztuko diote EAEko Fiskaltzari

Maialen Arteaga

Irailaren 7an bilduko dira fiskalarekin pandemiako testigantzak eta datuak biltzen dituen txostena helarazteko

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna