Denboraldiko itzulirik handienari eta gogorrenari ekiteko prest

Emakumezkoen egutegiko itzulirik handienari gaur emango zaio hasiera: Italiako Giroari. Izurriak eragindako osasun krisiaren ondorioz, 2020ko denboraldiko egutegia estutu eta atzeratu behar izan dute, baina lasterketa garrantzitsuenari ez diote duen balioa eta prestigioa kendu. Aurtengo Giroak bederatzi etapa izango ditu zehazki, iaz baino bat gutxiago. Lasterketaren 31. aldia izango da, eta Giroa Toskana, Umbria, Lazio, Campania eta Puglia eskualdeetatik igaroko da.

Hasteko, taldekako erlojupekoa izango dute txirrindulariek, sei kilometrokoa. Lau etapa amaituko dituzte mendian, eta zeresan handiena azken etapak emango du, Motta Montecorvino mendatean amaituko denak. Gainontzeko etapetan ere liderrak ezingo dira erlaxatu.

Munduko ziklistarik onenak nor baino nor gehiago arituko dira, eta maglia arrosa janzteko lehian, faboritoen artean, Annemiek van Vleuten (Mitchelton) nabarmentzen da. Azken bi aldietan gailendu da herbeheretarra, eta hirugarrena erreskadan irabazi nahi du. Lortuko balu, Marianne Vos herrikidearen pare jarriko litzateke.

Euskal Herriko bi taldek hartuko dute parte: Bizkaia Durangok eta Movistarrek. Halere, ez bata ez bestean ez da ariko euskal txirrindularirik. Ane Santestebanek (Ceratizit-WNT) soilik ordezkatuko du euskal txirrindularitza. 2018an, bederatzigarren egin zuen; iaz, hamabigarren. Lehen hamarretan sartzea du helburu.