KRITIKA. Musika

Gure euskal festa

Labeque ahizpak eta gainerako musikariak, <em>Amoria</em> zuzenean aurkezten.
Labeque ahizpak eta gainerako musikariak, Amoria zuzenean aurkezten. MUSIKA HAMABOSTALDIA / IÑIGO IBÁÑEZ

Arkaitz Mendoza -

2018ko abuztuak 31

'Amoria'. 79. Musika Hamabostaldia

Lekua: Donostiako Kursaaleko auditoriuma. Eguna: Abuztuak 28.

Nazioarteko hiru izen handiren proposamen batek euskal musika astindu berri du. Carlos Mena kontratenorraren ahotsak eta Katia eta Marielle Labeque ahizpen pianoek euskal musikak historian zehar bizi izan dituen estilo ezberdinak erakusteko gura izan dute. Horretarako eusko ezaugarrian maisu diren musikariak elkartu dituzte Amoria deituriko proiektuan. Labeque ahizpak Berlingo Orkestra Filarmonikoarekin parte hartu eta gero guregana hurbildu, herriaren taupadan barneratu eta gure musikaren erritmoetan blai bustitzeko desioa azaltzea onuragarri da denontzat, eta disko honetan elkartu dituzten parametro guztien fusioa zoragarri nahastu dute musikaren mesedetan.

Txalapartan Harkaitz Martinez de San Vicente eta Mikel Ugarte, Thierry Biskariren ahots inguratzailea eta Eñaut Elorrietaren pasioa ederki ulertu zen bidaia honetan. Ander Zulaikaren perkusioa sotiltasun osoz jaso zen Elena Martinez de Murgiaren ganbazko biolaren arku jorratzeekin batera, XV. eta XVI. mendeetako musikak goraipatzeko hain beharrezko ziren erritmo kutsatzaileak erakusteko. Baina emanaldiko unerik hunkigarrienetariko bat Easo Eskolania eta talde honen hurrengo belaunaldi den Araoz Gaztearekin iritsi zen. Gorka Miranda zuzendariak txalo zaparrada izugarriak jaso zituen azaldutako lana premiatuz; hemen ditugu hiriko haur ahotsik esanguratsuenetakoak eta Jesus Guridiren Ave Maria eta gure Gabriel Olaizolak idatzitako Haurtxoa seaskan kantak ikaragarri entzun ziren Lore Lopezen eta aurretik gabon kanta bat eskaini zuen Mañex Artolaren ahotsetan.

Carlos Mena musikaren funtzio guztietan iaiotasun apartekoan; kantuan zer esanik ez, haize egurrezko txistu jotzaile gisa duin eta panderetan jostagarri, euskal musika omentzen zen egun honetan bakoitzak barnean sentitzen zuena erakusteko unea zelako, inongo lotsarik gabe, hain ezkutuan gorde ditugun erritmoak, melodiak, eta batez ere hitz esanak airera jaurti eta hegan hasteko ordua iritsi delako. Biskariren Elurra Iruñean leun eta dotore eta Elorrietaren Haika mutil kantan Labeque zigilua zeraman piano soinu inguratzailea koroatze unea prestatzen hasi zen. Maurice Ravelen Bolero famatua txalaparta, kaskabel, danbor, bi piano eta panderetarekin josi zen, inoiz ahaztu beharko ez litzatekeen Zulaikaren kaxa joaldi hipnotikoaren inguruan. Eskerrik asko Mena eta Labeque, herrira hurbildu eta ekoizpen honetan denok parte hartu dugula dirudien sentsazioa helarazteagatik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna