Bere esku dago

Osasunak igotzeko kanporaketarako sailkatu nahi du gaur Valladoliden. Irabazita, helburua beteko luke; berdinduta, aukera asko lituzke
Osasunako jokalariak, gol bat ospatzen, sasoi honetan.
Osasunako jokalariak, gol bat ospatzen, sasoi honetan. IÑIGO URIZ / FOKU

Eñaut Agirrebengoa -

2018ko ekainak 2
Dena ikasturte bukaerarako uzten duen ikaslearen modukoa da Osasuna. Nekez izaten du liga amaiera lasaia. Gorabeheratsu aritu ondotik, amaieran estutua eman beharrean izan ohi da. Bada, tradizioari jarraikiz, sasoi honetan ere azken jardunaldi zirraragarria izango du. Gorritxoek ez dute esperotako maila eman denboraldian, eta ezin izan dira Espainiako Bigarren Mailako talde indartsuenekin parez pare lehiatu. Nolanahi ere, azken txanpan bolada ona harrapatu dute, eta mailaz igotzeko kanporaketa jokatzeko aukera handiarekin iritsiko dira gaur Valladolidera (Espainia).

Sportingek eta Zaragozak jada ziurtatu dute kanporaketa jokatzea. Liga laugarren edo bosgarren postuan bukatuko duten jakitea bakarrik falta zaie. Hala, Osasunarekin batera, beste lau talde saiatuko dira geratzen diren bi postuetako bat lortzen: Valladolid bera, Cadiz, Oviedo eta Numantzia. Emaitzen 81 konbinazio posible daude, eta horietatik 57k sailkatzeko balioko liokete Osasunari. Hots, %70eko aukerak ditu, arerioek baino gehiago: Cadiz kasuen %58,2an sailkatuko litzateke, Valladolid %43,2an, Numantziak %20,9ko aukera baino ez du, eta are txikiagoa Oviedok, %6,1ekoa.

Valladolid menderatzea litzateke biderik seguruena nafarrentzat. Zazpigarren daude une honetan, kanporaketa postuetatik kanpo, baina, irabaziz gero, bosgarren posturaino igoko dira, aurkarien partidei erreparatu behar izan gabe. Cadizek ere irabaziz gero, berdinduta egongo lirateke 67 punturekin, baina Iruñeko taldeak aurretik bukatuko luke, golen aldea dela medio. Valladoliden aurka berdinduz gero, ordea, gorritxoak ez leudeke seguru. Hori bai, puntu bakarra aski izango litzaieke 27 kasu posibleetatik 26tan. Modu bakarra dago berdindu eta Osasuna lehen sei postuetatik kanpo gelditzeko: irabazi egin beharko lukete Cadizek, Numantziak eta Oviedok. Kasu horretan, Osasunak, Numantziak, Oviedok eta Valladolidek berdinduko lukete sailkapenean, eta azken hori Cadizekin sailkatuko litzateke.

Hori horrela, berdinketa batekin %96ko aukerak izango lituzke Diego Martinezen taldeak helburua lortzeko. Aitzitik, Valladolidentzat puntu bakarra ez litzateke nahikoa izango kasurik gehienetan. Bi taldeentzat berdinketa balekoa izateak asko erraztuko lituzke gauzak, baina, Espainiako taldeak kosta ahala kosta irabazi behar duenez, hobe dute nafarrek emaitzarekin ez espekulatu.

Galduta ere sailka daiteke

Gauzak nabarmen zailduko litzaizkioke Osasunari Valladoliden aurka galduko balu. Edonola, oraindik ere izango luke aukera kanporaketa jokatzeko; kasuen %14,8an sailkatuko litzateke. Egoera horretan, Cadizek galdu eta Numantziak eta Oviedok gutxienez berdindu egin beharko lukete gorritxoak onik atera ahal izateko. Aurkaririk gaiztoena Numantziak izango du, Cultural Leonesak garaipena behar baitu mailari eusteko. Cadiz helbururik jada ez duen Granadaren kontra ariko da, eta Oviedok dagoeneko Lehen Mailako taldea den Huescaren kontra jokatuko du.

Final gisa jo daiteke Osasunak gaur Valladoliden zelaian jokatuko duen partida, eta talde gorritxoa ez da bakarrik izango. Espainiako taldeak 600 sarrera eman dizkio Iruñeko taldeari; ez nahi adina, baina nahikoa zaleen babesa sentitzeko. Sarrerarik gabe bidaiatuko duenik ere izango da. Espainiako Indarkeriaren Aurkako Batzordeak arrisku handiko partidatzat jo du; beraz, egunean bertan ezingo da sarrerarik erosi txarteldegian.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Eñaut Agirrebengoa

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna