Garagardogintzari lotutako jardunaldiak egin zituzten atzo, baina azokak jarraituko du bihar iluntzera arte. Garagardo ekoizleen artean, Euskal Garagardoaren Elkarteari lotutako zenbait enpresaren produktuak izanen dira bertan. Bilkura, garagardogintzako profesionalei ez ezik, garagardoaren zaleei bideratua ere izanen da, beraz.
Bilboko garagardo azokak Europan sektoreak dituen joera berriak aztertu, ikertu eta zabaltzeko plataforma izan nahi du. Urteroko topaketa izanen dela azaldu dute antolatzaileek. Pandemiak eragina izan du azokan ere, eta ezin izanen da nahi beste jende sartu; 4.000 lagun hartzeko asmoa dute antolatzaileek. Horregatik, sarrerak leihatilan baizik ezin dira erosi. Sarrerarekin batera poltsa «berezi» bat jasoko du bisitariak, kopa batekin eta opari batekin. Gainera, azokako bi garagardo dastatzeko aukera izanen du sarreraren erosleak.
Tokiko garagardoa
La Salve garagardogileak dira azokaren antolatzaileetako bat, eta, beraz, han izanen dira haien garagardoak ere. Haiekin batera, Euskal Herriko zenbait garagardogilek izanen dute lekua Euskalduna jauregian: Boga, Baias, Gar&Gar, Olañeta, Pagoa, Maiken Brewery, Txorierri Garagardoak, Laugar, Etxeandia, Bidassoa, Byra, Mala Gissona, Baga Biga, Drunken Bros., Basabe, Basquery, Baobeer, Tito Blas eta Garagart.
Garagardo motak ere askotarikoak izanen dira: 50 estiloko edariak eskainiko dituzte. «Originaltasunagatik» hauek azpimarratu dituzte: american IPA, barrel-aged belgian dark strong, blonde ale, chocolate bock, english IPA, fruit saison, golden ale, imperial IPA, alkoholik gabeko IPA, irish red ale, maple pancake breakfast stout, spicy smoked, vanilla milk stout eta winter ale.
Eduardo Saiz La Salve garagardogileen zuzendariak azaldu ditu azoka antolatzeko dituzten arrazoiak: «Kongresu hau Bilbora ekarrita, hiria dagokion tokian jarri nahi dugu». Haren produktuaren alde egin du: «Duela sei urte, La Salve garagardoa merkatura itzuli zen. Gure asmoa ez zen soilik Bilboko garagardoa merkatura ekartzea; bertako garagardogintza berreskuratu nahi genuen, 1970eko urteetan galdu baitzen, hemengo garagardogile guziek itxi edo enpresa saldu zutenean». Azoka antolatuta, garagardogintzaren aparrean nahi dute Bilbo.