Bada, Museoen Nazioarteko Kontseiluak 1977an izendatu zuen maiatzaren 18a Museoen Nazioarteko Egun gisara. Azken bi urteotan ezin izan dute ospatu —online antolatu izan dituzte museo askok ekitaldiak—, baina aurrez aurre egiteko aukera izan dute aurten. Asteazkenean izan zen eguna, eta Euskal Herriko hainbat museok ospatu zuten ateak debalde irekita, artistekin solasaldiak antolatuta, tailerrak eginda, eta kontzertuak emanda. Museo handiek eta txikiek hartu zuten parte egun horretan, eta asteburura arte luzatu dute askok eta askok euren eskaintza.
Gasteizko Artium museoa da horietako bat. Hogei urte bete ditu aurten, eta doan da sarrera maiatz osoan. Tailerrak eta hitzaldiak antolatu dituzte, besteak beste, gaurko eta biharko. Raisa Alavak eta Irantzu Lekuek emango dituzte tailerrak: poltsak egitekoa Alavak, eta tximeletak egitekoa Lekuek. Hitzaldiak eta ikus-entzunezko proiektuen aurkezpenak ere egingo dira. Magnet-Erakarri proiektuari buruzko hitzaldia gaur, eta 20 urte, 20 arrazoi bideoaren emanaldia bihar, urteurrenaren inguruan.
Donostiako San Telmo museoan ere dohainik izango da sarrera gaur eta bihar, eta bisita gidatuak eskainiko dituzte museoko bilduma ikusteko. Francisco Escudero Kontserbatorioko ikasleek, berriz, kontzertuak emango dituzte museoko elizan eta klaustroan, eta doan izango dira, edukiera bete arte.
Oteiza Museoan ere (Altzuza, Nafarroa), dohainik izango da sarrera bihar eta astelehenean. Familian egiteko moduko tailer bat antolatu dute biharko (11:00-13:00). Etorkizuneko museoa. Etorkizuna museo batean izena jarri diote tailerrari, eta 3021. urtean museoak nolakoak izango diren diseinatzeko eskatuko diete, besteak beste, bertaratzen direnei —tokia aurretik hartu behar da helbide honetan: [email protected]—. Beste hainbat museok ere eskaintza berezia izango dute —Ipar Euskal Herrian, joan den asteburuan ospatu zuten Museoen Gaua—.
Museoen Eguna
Euskal Herriko hainbat museotan.
