Jarduera andana antolatu dute biharko: «10:00etan hasiko da azoka, eta sagarrez eta sagastiz osaturiko postuak egongo dira». 14:00etara artean, errezil sagarra izango da osagai nagusia. Irulegiren arabera, errezil sagarra egongo da salgai, baita errezil sagarrekin eginiko gozoak ere: «Marmelada, irasagarra, sagar errea eta abar». Sagarraz gain, baina, egongo da bestelakorik: baserriko elikagai ugari, babarrunak, intxaurrak, porruak, gaztain erreak eta abar. «Sagar muztioa ere egingo da, herritarrek egin dituzten artisau produktuak jarriko ditugu, eta sagar dultze lehiaketa eta ardi gazta lehiaketa herrikoia ere egingo dira», azaldu du Irulegik.
Sagarraren ibilbidea
Jateaz eta erosteaz batera, izango da sagarraren historia ezagutzeko aukerarik. 11:00etan, sagarraren ibilbidea egingo dute, bisita baten formatuan. «Errezilen sagasti asko daude, bai zaharrak baitaberriak ere; sagasti asko dauden bailara bat da. Pentsatu genuen polita izan zitekeela sagastiak bertatik bertara ikusteko ibilbide bat egitea». Ordubete pasatxo iraungo du bisita gidatuak, eta ibilbidean panel informatiboak egongo dira: «Errezilgo historia eta sagarraren historia azaltzen da panel horietan, baita herriko kondaira batzuk ere. Gainera,eguraldiak apur bat laguntzen badu, Hernioko bista ikusgarriak ikusteko aukera ere izango da».
Errezil sagarra ezagutzera ematea eta produktuarekin egin litezkeen gauza ugariak jendeari erakustea da astearen helburua. «Urteak daramatzagu azoka hau antolatzen, hogei urte baino gehiago. Guretzat inportantea da. Hemengo jendea azoka askotan ibiltzen da sagarrak saltzen, baina jendeak badu ohitura Errezileraetorri eta errezil sagarra bertan erosteko. Polita izaten da», esan du antolatzaileak.
Herriaren izen berbera du sagar mota horrek, baina Irulegik esan duenez, errezildarrek beste modu batean deitzen diote: «Herrian ibarbi sagarra izenez deitzen zaio. Herritik kanpo, bestalde, errezil sagarra izenarekin ezagutzen dute». Errezilgo bailara baten izena da Ibarbi, eta hortik dator izendapena. Sagasti asko dituen bailara izanik, modu «berezian» bizi dute herritarrek sagarraren astea: «Guretzat pozgarria izaten da 10:00etan azoka ireki eta 10:30ean jendea biltzen ikustea:saskia eskuetan dutela, erosteko prest».
Errezil Sagarraren Eguna
Bihar, 10:00etatik 14:00etara,Errezilen (Gipuzkoa).