«Kaleko kulturako adierazpenei baliabide eszenikoak ematea da gure xedea», azaldu du Ander Garaizabal antolatzaileak. Haren arabera, haur, gazte eta helduei zuzendutako jaialdi bat da. Kaleko dantzen lehiaketarekin hasiko da, 18:45ean. Bi kategoria izango dira: gaztetxoena eta helduena. Elorrioko, Derioko (Bizkaia) eta Aretxabaletako (Gipukoa) saioetan sailkatutako taldeak arituko dira; hiru talde kategoria bakoitzean. «Azken bost urteetan izugarri egin du gora kaleko dantza jardunak Euskal Herrian», nabarmendu du Garaizabalek.
Aretoko breakdance lehiaketak emango dio segida festari.Herbehereetako The Ruggeds eta Bordeleko (Okzitania) The Immigrands taldeak arituko dira. Bi taldeek jokatuko dute azken breakdance lehia, 20:30ean. Bilboko Feel The Sound taldeak ikuskizuna egingo du.
Parkourrak ere izango du tartea Break On Stage jaialdian. Aritz Sevilla, Jose 3run, Alba Salazar, Hodei Delgado eta Jagoba Castañeira izango dira euren abileziak erakutsiko dituztenak. Akrobaziak eginez, agertoki ondoko zirkuitu batean jarritako oztopoak gainditu beharko dituzte.
Gurpil gainekoak
Gorputz hutsez eginiko adierazpideetan arituko dira batzuk; beste zenbaitek, berriz, gurpil ibilgailuak erabiliko dituzte: bizikletak eta patineteak. Haien artean izango dira Izan Garcia lezamarra eta Aitor Palencia irundarra. Bertakoez gain, Ruben Doniga etorriko da Madrildik, eta Alex Perez eta Marti Samper Bartzelonatik. World Rollers Game lehiaketarako sailkapena izango dute jokoan.
Ikuskizuna 18:45ean hasiko da, baina aurretik ere izango da zertaz gozatua pabiloiaren kanpoaldean; hain zuzen, banakako lehiaketak egingo dituzte, 15:00etan hasita. Lehiaketen eta erakustaldien ostean ere izango da jai giroa, rap abeslarien ordua izango baita 20:30ean. Tolosako (Gipuzkoa) MC Nikotina arituko da lehenik. «Euskal rap abeslari gazte bat da, eta jokoa emango du», aurreratu du antolatzaileak. Nachek hartuko dio lekukoa hari. Almanauta azken diskoa aurkeztuko du.
Kaleko artearen festak 5.000 ikus-entzule inguru biltzen ditu urtero. Iaz Derion (Bizkaia) egin bazen ere, aurten Bilbora itzuli da Break On Stage ikuskizuna. Berriro ere kaleko artearen erakusleiho izango da Bizkaiko hiriburuko pabiloia.
