Frantziako, Italiako, Espainiako eta Euskal Herriko 50 mintegik jarriko dituzte ikusgai eta salgai euren landareen aleak postuetan. Landare espezie horiek Euskal Herrian ezezagunak dira, baina bertaratzen direnek lorategietan landatzeko aproposak diren landareak ere erosi ahalko dituzte. Horregatik, antolatzaileen hitzetan, Euskal Herriko mintegiek euren produktuak erakusteko eta saltzeko aukera ere bada Landare Berezien Azoka.
Azokaren antolatzaileek azaldu dutenaren arabera, aurtengoak zenbait berrikuntza izango ditu; besteak beste, Gipuzkoako bi mintegi berri egongo dira: Aleka mintegiak (Beizama) barazki ekologikoen haziak jarriko ditu salgai, eta Astigarragako Loraldi mintegiak, berriz, landare bizkorrak, belarkarak eta banbuak eskainiko ditu. Mintegien postuez gain, ekoizleek bederatzi postu jarriko dituzte bihar goizean Aiako plazan, landareak eta landareekin zerikusia duten hainbat produktu saltzeko: garai honetako landareak, usaindunak, kozinatzeko aproposak direnak, xaboi eta lurrunak, landare olioak, laborantza ekologikorako produktuak, artisauak eta abar.
Landare Berezien Azoka Pagoeta natur parkean egingo dutenez, parkeko lorategiko ibilbideetatik paseatzeko aukera egongo da, eta parkeko arduradunek bisita gidatuak eskainiko dituzte.Biodibertsitatearen lorategira egingo dituzte bisita horiek, gaur eta bihar. Goizean egingo dira, eta 11:30ean izango da euskarazko bisita.
Gero eta bisitari gehiago
Aintzat hartuta azken urteotan bisitarien kopuruak gora egin duela, bi aparkaleku gune antolatu dituzte: Aiako Harria eta Txurrutxako aparkalekua. Gainera, autobus zerbitzu berezia jarri dute aparkaleku horietatik azokara joateko eta itzultzeko. Bestalde, autoz joan beharrean trenez joatea erabakitzen duten horientzat ere izango da autobus zerbitzu berezia, Zarauzko Euskotren geltokitik azoka gunera, alegia.
Sarrerak azokan bertan erosi ahalko dira: prezioa 4 eurokoa izango da helduentzat, eta 12 urte edo gutxiagokoak doan sartuko dira. Prezioak barne hartuko ditu aparkalekuetatik azokarainoko autobusezko joan-etorria, erositako landareentzako kontsigna zerbitzua eta eroslearen ibilgailurainoko landareen garraioa.
Landare Berezien Azoka
Gaur eta bihar, 10:00etatik aurrera, Aian (Gipuzkoa).