Eskuak behar dituzte

Erakusmahaiak, tailerrak eta ikastaroak izanen dira Irungo Ficoban egiten ari diren eskulanen azokan. Bihar arte izanen da zabalik
Bi emakume iazko eskulan azokan, Ficoban, eskuz egindako produktuak begiratzen.
Bi emakume iazko eskulan azokan, Ficoban, eskuz egindako produktuak begiratzen. JON URBE / FOKU

Iker Tubia -

2018ko irailak 29
Haurrak eskuekin jostatzen dira sarri. Jolas horietako batean, borobilean jarri, eskuak atzean ezkutatu, eta denek batera atera behar dute eskua, harriaren, paperaren edo aizturraren itxura imitatuz. Harri, orri, ar! hitzek markatzen dute eskua denek batera ateratzeko unea. Bada, izen hori hartu du iaztik Irunen (Gipuzkoa) antolatzen den eskulanen azokak ere. Ez da haurrentzako azoka bat, nahiz eta haiendako gune bat ere izanen duten. Atzo abiatu zen Ficoba erakustazoka, eta bihar arte egonen da zabalik.

Norberaren esku dago azokan nola parte hartu erabakitzea, baina eraskumahaiez gainera, tailerrak eta ikastaroak izanen dira han. Orotara, ehun jarduera baino gehiago. «Azoka bizipen esperientzia bihurtzea nahi dugu: hona erostera ez ezik, jardueretan parte hartzera eta ikastera ere etortzea dago», azaldu du Elena Casuso Harri-Orri-Ar azokako zuzendariak. Antolatutako jarduerak eskulanen zaleentzat ez ezik, jakin-mina dutenentzat ere badirela gogorarazi du. «Gure asmoa da gune horretan eskulanen zaleak direnak eroso sentitzea, baita oraindik zale ez diren horiek ere».

Aurten, nabarmendu dutenez, eskulanen alorreko influencer-ak izanen dira Ficoban, tartean Susi Miu eta Ameskeria. Causoren esanetan, horrek agerian uzten du bigarren urtea izanagatik ere azokak «berezko tokia» hartu duela eskulanen «unibertsoan». Beraz, azokan sare sozialetan eragina bilatzen duten pertsona horiekin elkartzeko eta solasteko parada izanen dute parte hartzaileek. «Haietako askok sorkuntza onenei buruzko tailerrak emango dituzte».

Tailer eta ikastaro askotan parte hartzeko aldez aurretik izena eman behar da www.harri-orri-ar.com webgunean, eta ordainpekoak izanen dira. Horrekin batera, eskulanen mundutik urruti diren horiek erakartzeko doako tailerrak antolatu dituzte. Adibidez, gurutze puntuko XL instalazioa muntatu dute. Hor, horma irudi erraldoi bat eginen dute guzien artean, gurutze puntuarekin. Bestalde, haurrek beren gunea izanen dute azokan, eta han ere tailerrak eskainiko dituzte. Nabarmentzekoa da slime orea sortzeko tailerra. Norberak nahi duen bezala eralda eta molda dezake slime-a, bere garaian Blandi Blub deitzen zenaren antzekoa. «Proposamen hau eskuak zikintzea gustuko duten pertsona dibertigarri eta ikusberei zuzenduta dago».

Hiru eremu

Eskulanak salgai dituzten eremua hiru ataletan banatuta dago. Harri deitutako gunean, brikolajea eta dekorazioa izanen dituzte ardatz; Orri arean koadernaketa, papergintza, scrap edo decoupage izanen dira gaiak; eta Ar gunean hariekin eta joste lanekin loturikoak egonen dira.

Harri-Orri-Ar azoka

Gaur eta bihar, 11:00etatik 19:00etara, Irungo Ficoba erakustazokan (Gipuzkoa).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna