Tirunesh Dibabak Radclifferengana gerturatu nahi du
Pistan irabaz daitekeen guztia irabazi ondoren, maratoian ari da buru-belarri Tirunesh Dibaba (Bekoji, Etiopia, 1985). Etzi, laugarrenez lehiatuko da, estreinakoz Berlinen. Hiru maratoi besterik ez ditu behar izan proba horretako inoizko onenen artean egoteko. Bosgarrena da, 2.17.56ko markarekin, iaz Londresen lortua. Bi atletak bakarrik egin dute korri azkarrago: Paula Radcliffe britainiarrak eta Mary Keitany kenyarrak. Radcliffena da, hain zuzen, munduko marka, 2.15.25, duela hamabost urte Londresen egindakoa. Makina bat urtez inor ez da gerturatu haren denboretara, baina, iaz, Londresen, Keitany eta Dibaba bikain aritu ziren. Kenyarrak irabazi zuen, eta inoizko marka onenetan bigarrena lortu du: 2.17.01. Haren atzetik sailkatu zen Dibaba. Berlinen ez da ariko Keitany, eta hori baliatu nahi du etiopiarrak, irabazi eta Radclifferengana gehiago gerturatzeko.
Iruzkinak
Ez dago iruzkinik
Ordenatu