Autogobernuaren eztabaida zabaldu nahi dute Nafarroan

Datorren urteko maiatzean amaituko da legealdia, eta ordurako Nafarroako estatus politikoari buruzko eztabaida martxan egotea nahi du EH Bilduk. Adolfo Araiz eta Bakartxo Ruiz bozeramaileek agerraldi bat egin zuten atzo urte politiko berriaren ardatzak xehatzeko. Bertan, Araizek adierazi zuen Nafarroaren autogobernuari buruzko eztabaida «gutxienez» martxan jarri beharra dagoela, uste baitu legealdian «oso pauso gutxi» eman dituztela alor horretan.

Zehazki, salatu du Espainiako Gobernua, PPren gidaritzapean egon den urteetan, «itxita» azaldu dela «edozein planteamenduren aurrean», eta beharrezkotzat jo du aurrerapausoak ematea «nafarrek beren etorkizuna erabakitzeko eskubidearen» aitortzan.

Halaber, legegintzaldia amaitu aurreko azken urte politikoaren garrantzia azpimarratu dute Ruizek eta Araizek, eta gogorarazi datozen hilabeteetan hogei bat foru lege tramitatu behar dituztela; besteak beste, berdintasunari, tokiko mapari eta Poliziari buruzkoak. 2019ko maiatzeko udal eta foru bozetan «gehiengo soziala gehiengo politiko» bihurtzera deitu dute.