IRLEN SAREA

Sindikatuapp

Gorka Julio -

2019ko uztailak 6
Sindikatuak egitura batzuk dira langile edo kontratu bidezko harreman bat duten pertsonek lan arloan edo arlo sozioekonomikoan dituzten arazoei aurre egiteko antolatu eta defendatzeko sortuak. Prekarizazioarekin zailago izan arren, sindikatuak ez zeuden tokian sindikatu berriak jaiotzen hasi dira, baita espero gabeko esparruetan ere, adibidez etxebizitza alokairuen alorrean. Teknologia erabil liteke langileen arteko elkartasuna bultzatzeko? Goazen sindikatuapp batekin amestea.

Sindikatuapp-a ireki dugu sakelakoan. Han sindikatu guztien informazioa daukat eta haiek jarrai ditzaket, berdin du afiliatua egon ala ez. Afiliazio azkar bat ere eskaintzen du aplikazioak, nahiz eta gero sindikatura bertaratu behar dudan, ofizial egin nahiko banu. Afiliatua nagoen horretatik, ordea, mezu berezituak bidaltzen dizkidate eta eduki pertsonalizatua. Oraintxe, adibidez, ia 200 eguneko greba batean murgilduta gaude eta hortik iristen zaizkigu informazio gehienak.

Txat pribatu bat ere badugu, eta mobilizazioan ari garenok horretatik komunikatzen gara zuzenean. Txat zifratua da, iraungitzen diren mezuak bidaltzeko aukera du eta aplikaziora sartzeko ere kodea dauka, telefonoa esku txarretan eroriko balitz zailago egiteko hara sartzea.

Aplikazioaren beste zerbitzu interesgarri bat kontsultena da. Sindikatuta egon edo ez, sindikatu guztien ekarpenekin kontsulta zerbitzu orokor bat dago. Lanari, kontratuei, hitzarmenei... buruzko duda txikiak, azkar erantzuteko aukera ematen duen zerbitzu bat. Whatsapp moduko baten bidez zalantzak bota eta erantzunak jasoko dituzu. Mezu bakoitzaren azpian, erantzun dizunaren izena eta haren sindikatua ikusiko dituzu; gero sindikatzeko erabakia hartzen baduzu, beharbada kontuan hartzeko.

Atal pribatua interesgarria da, baina aplikazioaren atal publikoa gehiago erabiltzen dugu. Hainbat borroka eta aldarrikapenen informazioa jasotzeaz gain, mobilizazioen deialdi eta ekimen zehatzen agenda ere badugu. Oso garrantzitsua, langile, aktibista, lagun, familia eta beste sindikatuetako kideekin koordinatzeko.

Dena ez da, ordea, aldarrikapena izango: tresna komunitate propio bat eraikitzen ari da, eta aplikazioaren erabiltzaileek beren kargu hartu dute hurrengo Maiatzaren Lehenean ekimen bateratu bat antolatzea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna