Ikastolen Elkarteak 100.000 euro emanen dizkio Seaskari

Ekhi Erremundegi Beloki -

2017ko ekainak 21
Ikastolen Elkarteko elkartasun kutxatik 100.000 euro emanen dituzte Seaskak Baionan irekitzekoa duen lizeo berriaren eraikuntza lanak ordaintzeko. Ekarpen horrekin, milioi bat euro aurkitzea falta zaio Seaskari hamar milioi euroko kostu orokorra estali ahal izateko. Abendu bukaerarako diru hori lortu ez badute, mailegu bat eskatuko dute.

«Urtero, familia bakoitzak 15 euro ematen ditu haur bakoitzeko, zailtasunetan diren ikastolak edo proiektu berriak laguntzeko», azaldu zuen Koldo Tellitu Ikastolen Elkarteko lehendakariak atzo. Eraikuntza lanak nola aitzinatzen diren ikustera joan zen Baionara. Uztail hondarrerako bukatu behar dituzte obrak, eta abuztu osoa ikasgelak antolatzen pasatuko dute, ikasturte hasierarako dena prest egon dadin. «Hunkituta» eta «aho zabalik» dago Tellitu Ipar Euskal Herriko ikastolen garapenarekin.

Materialaren diruztatzeaz gurasoak arduratzen dira, eta, hor ere, helburuen erdia lortu dutela azaldu zuen Jeff Mateo Etxepare lizeoko lehendakariak. «Abendura arte segituko dugu sagarrondoak saltzen; ondotik, Baionako Herriko Etxeak utzi digun lur eremu batean landatuko ditugu horietako 600, laborari gazte batek bere esku har ditzan». 150.000 euro falta zaizkie.

Lanbide heziketan bi sail

Baionan irekitzekoa duten lizeo berria Seaskaren garapenaren erakusgarri da, lehen aldiz, lanbide heziketako bi sail irekiko baitituzte: sozial arlokoa bat eta merkataritza arlokoa bestea. Errektoretzak bakarrarentzat eman die baimena, sail bakoitzeko gutxieneko hamar ikasleko baldintza ez zutelako betetzen. Hala ere, Seaskak bere gain hartu, eta biak irekiko dituzte. «Guretzat ezinezkoa zen hasieratik hamar ikasleren heina lortzea», azaldu zuen Paxkal Indo Seaskako lehendakariak. Irekiera ofizial egin denetik, bi sailentzat 15 ikasle inguru dituztela azaldu du. Lizeoa lekuz aldatuta, Baionan laugarren kolegio bat irekiko dute.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna