Albistea entzun

Gastronomia

Perfekzioa zer den

Culinary Zinemak 11. ekitaldia osatu du. Aurten ere egin dute bidaia bat Japoniara. 'The Pursuit of Perfection' pieza estreinatu dute, eta Yong Wu Nagahira sukaldari gazteak kozinatutako menua dastatu.
Sukaldaria. Yong Wu Nagahira, Ikigai jatetxeko chefa. Basque Culinary Centerreko sukaldean.
Sukaldaria. Yong Wu Nagahira, Ikigai jatetxeko chefa. Basque Culinary Centerreko sukaldean. BCC Tamaina handiagoan ikusi

Enekoitz Telleria Sarriegi -

2021eko irailak 25 - Donostia

«Helmuga bat izateak ez dit laguntzen hobetzen; helmugarik ez izateak egiten nau hobeago. Bezperan baino hobeto aritu behar dudala pentsatuz esnatzen naiz egunero». Takaaki Sugita sushi maisuaren pasarte horrek laburbiltzen du The Pursuit of Perfection dokumentalaren funtsa, Japoniako sukaldaritzaren ikusmoldea eta Tokioko sukaldarien jarduna. Aurtengo Basque Culinary Zineman eman duten laugarren pieza izan da Toshimichi Saito zuzendari japoniarraren estreinako hori. Herrialde horretako lau sukaldariren pentsamoldeak, egiteko moduak eta ekiteko erak kontatzen dira lanean. Takemasa Sinhoarak, Natsuko Shojik, Yosuke Sugak eta Takaaki Sugitak ibilbide eta jarrera ezberdinak dituzte sukaldean, baina denek dute ezaugarri bat berbera: perfekzioaren bila aritzen direla.

«Bere burua hobetzen saiatzen den sukaldari oro ari da perfekzioaren bila». Ez da dokumentaleko beste pasarte bat, Yong Wu Nagahira sukaldari gaztearen esana baizik. Madrilgo Ikigai jatetxeko chefak jarri baitu mahaian aurretik pantailan kontatutako guztiaren esentzia. Hori da Culinary Zinemaren oinarria: zinean ematea lehenengo, eta platerean gero. Atzo amaitu zen aurtengo ekitaldia, hamaikagarrena. Japoniara egindako bidaia izan da azken aurreko hori.

«Baina zer da perfekzioa? Hor dago gakoa», azpimarratu du Nagahirak. Eta Basque Culinary Centerren emandako afaria ez da perfekzio horretatik oso urruti ibili: kuia eta jogurt espeziadun harumakia; gilda Japoniako zaporeekin; niboshi eta tomatezko dashi burbuilatsua, shimesaba berdela eta albaka olioa; Japoniako alberjinia wontona, bakailao kokotxa, misozko porrusalda, shichimi olioa eta oliba olioa; esparden?ak bere pil-pilarekin; te berdea eta Japoniako whisky gunkana, ikura eta galeper gorringoa; Japoniako basurde currya; eta kansha aran gorria, miso zuria eta sakea. Euskal sukaldaritzari egindako keinuak gildarekin, kokotxarekin eta porrusaldarekin. Mahaiaren bueltan eseritakoen onarpen keinuak, irri zabalekin eta baiezko kolpeekin.

Nagahirak 32 urte ditu. Japoniakoak ditu sustraiak; Parisen jaiolekua, eta Madrilen ikastokia eta bizitokia. Horregatik da haren sukaldaritza hainbat kulturaren arteko nahasketa, baina oinarri gisa Japoniakoa hartuta, Espainiakoaren zertzeladak eta egiteak erantsita, eta Frantziakoren saltsek bustita.

Beste ikuspegi bat

Eroso aritu zen Basque Culinaryko sukaldeetan, eta giro oso lasaia eta goxoa lortu zuen ikasleen artean —Cristina Lirola BCCko irakasle eta sukaldariaren laguntza izan zuen azken burukoetan, eta hark berretsi zuen hori—. Afalosteko tertulian Nagahirak azaldu zuen Japoniakoak baduela sukaldaritzaren «beste ikuspegi» bat. «Produktuan dago oinarrituta erabat. Ahalik eta gutxien ukitzen dute. Hemen, Frantziako sukaldaritzaren eragina oso handia da, eta saltsari garrantzi handiagoa ematen zaio. Akordatzen naiz nola etorri zen behin emakume japoniar bat jatetxera. Ostra bat atera nion, saltsa eder batekin. Egun erdia pasatu nuen saltsa hura egiten. Eta esan zidan: 'zergatik botatzen diozu saltsa ostrari, bere horretan ona dago eta?'. Haien pentsamendua hori da: gutxiago gehiago dela».

Nagahirak, hala ere, onartu du berari hori «aspergarri samarra» egiten zaiola, «joko gutxi» ematen diola, eta nahiago duela «jokatu». Horren seinale izan ziren eskaini zituen platerak.

Culinary Zinemaren aurtengo ekitaldia atzo gauean amaitu zen. Eric Besnard zuzendari Frantziarraren Délicieux filma ikusi zuten, eta Lara Rodriguez eta Antonio Belotti sukaldari gazteek eman zuten afaria.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Inauterien aurrekari gisa, kaldereroak atera ziren atzo Donostiako hainbat auzotan. Grosen, zartaginari joka aritu ziren makina bat lagun. ©MAIALEN ANDRES / FOKU

Zorion kalderero denoi

Urtzi Urkizu

Santa Ageda bezperarekin bat egin dute Donostiako kaldereroek. Grosen urte asko daramatzaten kaldereroak eta hasiberriak aritu dira zartaginari jo eta jo, musikaren erritmoan.
 ©ENDIKA PORTILLO / FOKU

«Garbitzailea ezinbestekoa da ospitale batek ondo funtzionatu dezan»

Unai Etxenausia

Urte luzeak eman zituen Lorenzok Gasteizko Santiago ospitaleko gela guztiak garbitzen. «Lan gogorra» izan arren, goxo oroitzen ditu korridore horietan bere lankideekin batera pasatutako orduak eta haiengandik jasotako tratua.
Alina eta Sasha, <em>A House Made of Splinters</em> dokumentaleko haurretako bi. ©FILMIN

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.