Albistea entzun

ALAVES 1 EIBAR 2

Kontrako bideak hartu dituzte

Distirarik gabe, baina nagusitasunez irabazi dio Eibarrek Alavesi. Bigun aritu dira arabarrak, eta eraginkor, berriz, gipuzkoarrak. Bi taldeek hamar jokalarirekin bukatu dute partida
Manu Garcia Alaveseko jokalaria, Joan Jordan Eibarrekoari baloia kendu nahian.
Manu Garcia Alaveseko jokalaria, Joan Jordan Eibarrekoari baloia kendu nahian. JUANAN RUIZ / ARGAZKI PRESS

Eñaut Agirrebengoa -

2017ko azaroak 26

Golak. 0-1: Jordanek (33. min); 0-2: Charlesek (69. min); 1-2: Burguik (91. min). Epailea. Munuera Montero. Txartel gorriak: Alaveseko Santosi eta Eibarreko Charlesi; eta, txartel horiak: Alaveseko Elyri, Vigarayri eta Pachecori; eta Eibarreko Dani Garciari, Capari eta Juncari. Bestelakoak. 19.272 ikusle Mendizorrotzan.

Atzerako ispiluari so egin, eta Eibarrek jada ez dakusa Alavesen arrastorik. Bidegurutzea zegoen atzo Mendizorrotzan, eta oso ildo ezberdinak hartu zituzten bi taldeek. Gipuzkoarrek kolpea eman zuten mahai gainean, erreskadan bigarren garaipena lortuta, eta, hala, bide onari heldu zioten. Ez zen edonolakoa izan atzo emandako pausoa: jaisteko postuak zazpi puntura dituzte dagoeneko. Arabarrek, ordea, okerreko bidea hartu zuten. Itxura hauskorra eman zuten hamaikagarrenez, eta esku-hutsik gelditu ziren finaltzat zeukaten neurketa batean. Beraz, litekeena da atzoko bidegurutzean Alavesen gurutze bidea hasi izana. Esperantza izateko zioak agortzen ari zaizkie.

Alavesi hasieratik bertatik okertu zitzaion norgehiagoka. Alexis atzelariak kolpe itsusia hartu zuen laugarren minutuan, eta zelaitik ohatilan atera ondotik, ospitalera eraman behar izan zuten, zerbikaletako traumatismoarekin. Sustoa besterik ez zen izan, atzo bertan bidali baitzuten etxera. Horiek hala, De Biasik lehia hasi eta berehala egin behar izan zuen lehen aldaketa; Vigarayk bete zuen Alexisen tokia. Ezbeharrak jota utzi zituen etxekoak, eta neurketatik kanpo izan ziren minutu luzez. Eibarrek hartu zuen aginte makila, eta jokoa hegaletatik bideratzen ahalegindu zen. Kosta egin zitzaion abagune garbiak sortzea, baina, bederen, berretsi zuen azken sasoietako bertsiora itzultzen ari dela.

Etxekoek lehen hogei minutuak bete ostean berreskuratu zuten konortea. Pixkanaka, jokoa sortzen ahalegindu ziren, Wakasoren eta Sobrinoren eskutik batik bat. Horiek hala, 29. minutuan aukera ona izan zuen Santosek, ghanatarrak ateratako alboko sake baten ondoren. Baloia area barruan jaso zuen aurrelariak, baina ez zuen asmatu hiru zutoinen artera jaurtitzen. Hots handirik atera gabe, arabarrak gora ari ziren egiten. Bada, ondoen zeudenean, Eibarrek 0-1ekoa sartu zien. Alejok eskuin hegaletik erdiratu, eta nahaspila galanta izan zen arean. Anabasa horri etekina atera zion Jordanek, atzetik bakar bakarrik sartuta. Zorte txarra eta kontzentrazio akatsak, biak izan zituen Alavesek. Zaharrak berri.

Charlesek itxi zuen lehia

Bigarren zatiari abantaila handiarekin ekin zion Eibarrek. Alde batetik, aurretik zen markagailuan, eta, bestetik, jokalari bat gehiago zuen zelaian. Izan ere, Santosek bigarren txartel horia ikusi zuen atsedenera iritsi aurretik. Txilenaz errematatzen saiatu, eta buruan ostikoa eman zion Arbillari. Gozatua hartzeko aukerako egoera zuten gipuzkoarrek, baina urratsa atzera egin zuten, aurrera beharrean. Bazuen arriskurik estrategia horrek, aukera eman baitzion Alavesi berdinketarekin amesteko. Partida oso aldapa gora izanagatik, euren aukeretan sinistu egin zuten gasteiztarrek. Ez zuten etsi, azken jardunaldian Getafen jazo ez bezala.

Kontraeraso arriskutsua egin zuten 55. minutuan, Manu, Ibai eta Sobrinoren bidez. Jokaldiari errematea ematea besterik ez zen falta izan. Eta bi minutu geroago baloia sarera bidali zuen Ibaik, baina baliogabetu egin zuen epaileak. Berdinketa Eibarren bigarrena baino gertuago zegoen. Haatik, 69. minutuan Eibarrek zapuztu egin zuen arabarren esperantza oro, 2-0ekoa egin baitzuen Charlesek, Alejoren erdiraketa buruz errematatuta. Etxekoak arriskatzen hasiak ziren, eta zuloak ondo profitatu zituzten Mendilibarren mutilek. Hortxe bukatu zen partida. 82. minutuan txartel gorria ikusi zuen Charlesek, eta luzapenean 1-2koa sartu Burguik Alavesentzat, baina beranduegi zen jada.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BENFICA

«Asko ikasi dut hilabete hauetan, halako heldutasun bat nabari dut»

Iñaki Berastegi

Benfica taldean eta Lisboa hirian «gustura» dago Ander Izquierdo: «Beste esperientzia bat bizi nahi nuen». Sasoia min hartuta hasi ostean, «pixkanaka» tokia egin du taldean.
Fem van Empel eta Mathieu van der Poel, garaipena ospatzen, Munduko Txapelketan. ©UCI-BAS CZERWINSKI / EFE

Etxean bezala, inon ez

Eñaut Agirrebengoa

Fem van Empelek eta Mathieu van der Poelek ziklo-kroseko Munduko Txapelketa irabazi dute, etxeko zaleen gozamenerako; aurrenekoz gailendu da Van Empel, eta bosgarrenez Van der Poel.
Eskalatzaile bat, aldapan gora, pioletak eta kranpoiak lagun dituela. ©XABIER MUJIKA

Iraule: Nardasakon kanala

Xabier Mujika

Aizkorriko kanalen artean, Nardasakon da errazenetako bat. Aproposa da pioletekin eta kranpoiekin hasiberriak direnentzat.
Haur bat eskalatzen, atzean laguntza daukala, Donostiako The Factory Boulderren. ©MAIALEN ANDRES / FOKU

Modaren sokatik zintzilik

Beñat Mujika Telleria

Azken urteetan gorakada nabarmena izan du rokodromoko eskaladak. Garai batean mendira eskalatzera joaten zirenak noiznahi presta zitezen sortu ziren, baina, gaur egun, geroz eta bereiziago daude bata bestetik. Kirol osoa da, mugimendu asko lantzeko aukera ematen baitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...