Albistea entzun

ALAVES 0 REALA 2

Arriskua: sari eta zigor

Realak irabazi dio Alavesi Mendizorrotzako derbia, azken hamabost minutuetan sarturiko bi golei esker. Oiartzabal eta Aritz Elustondo izan dira golegileak
Realeko jokalariak Mikel Oiartzabalek atzoko partidan sarturiko gola ospatzen. Atzean, harmailetan, Alaveseko zaleak atsekabetuta.
Realeko jokalariak Mikel Oiartzabalek atzoko partidan sarturiko gola ospatzen. Atzean, harmailetan, Alaveseko zaleak atsekabetuta. ADRIAN RUIZ DE HIERRO / EFE

Aitor Manterola -

2017ko urriak 15

Golak. 0-1: Oiartzabalek (77. min). 0-2: Aritz Elustondok (81. min.). Epailea: Alberola Rojas. Txartel horiak: Alaveseko Duarteri; eta Realeko Llorenteri. Bestelakoak. 19.840 ikusle Mendizorrotzako derbian; tartean, Realeko zale asko ere bai.

Bi talde zeharo ezberdin dira Alaves eta Reala jokoa aztergai hartzen bada. Jakina da zertara jokatzen duen Eusebioren taldeak, eta arabarren ezaugarriak ere oso argi daude Gianni De Biasi italiarrak taldea zuzentzen duenetik duela hiru astetik. Baloia nahi eta behar du Realak; baloia ahalik eta gutxiena edukitzea da Alavesen moldea orain. Ñabardura asko dituen gaia asko laburbiltzen hasita, erasoa eta defentsa aritu ziren atzoko derbian aurrez aurre, Mendizorrotzan.

Emaitzari bakarrik begiratzen bazaio, 0-2koak ematen du aditzera Reala hobea izan zela, eta erasoko jokoak gaina hartu ziola defentsakoari. Jokoa osotasunean aztertzen bada, ez zen bietako inor nagusitu, baina. Oso berdindua izan zen partida, bakoitzak berea ondo antzean egin zuelako: Realak baloiaren jabetzaren bidez izan zuen kontrola, eta Alaves eroso aritu zen baloiaren atzetik jarrita, aurkariari baloia erabiltzen asko utziz. Ikuspegi zabaleko azterketa horretatik abiatuta, lupa batekin hasiz gero bataren eta bestearen jarduna xehatzen, esan behar da Realak oso min gutxi egin ziola Alavesi baloiarekin. Baloia eduki zuen, nahi beste eta gehiago, baina aukera horri ez zion etekinik atera Pacheco atezainari lana sortzeko. Ia ez zuen aukerarik sortu Realak.

Alavesen lana xehetzen hasita, erasoan ezer gutxi egin zuen, eta ez zion batere probetxurik atera defentsan talde osoak egindako lan eskergari. Kontraerasoa zuen arma ia bakar, baina ez zuen apenas gauzatu ahal izan.

Horrelako bi talde parez pare izanda, ezin tentazioari eutsi, eta arriskua hitzaren inguruan aritu beharra dago. Badira hainbat teoria: zeinek hartzen du arrisku gehiago, baloia lagun erasoan jokalari askorekin jokatzeagatik atzealdea ia biluzik uzten duen taldeak, ala defentsan sekulako jokalari pila jarriz ia bere arearen gainean defendatzen duen taldeak? Teorizazio honen inguruan, behin hauxe esan zuen Juanma Lillok: «Arriskatzea zer den? Arriskuak ez hartzea». Baieztapen hori atzoko derbira eramaten bada, Alavesek arrisku handiak hartu zituen lan guztia defentsako jardunean oinarrituz, eta bere area barrutik egindako bi errematetan sartu zizkion golak Realak: Oiartzabalek maisutasunez ezkerrez, 77. minutuan, eta Aritz Elustondok 81.ean, korner baten segidan, bere jaurtiketa Alaveseko jokalari batek urrundu eta sarera joan zenean. Arriskatzea erasora joateari deitzen bazaio, Realak saria jaso zuen; aldiz, arriskatzea, norbere arean defendatzea bada, Alavesek zigorra izan zuen.

Oso aukera gutxiko lehia

Teorizatzeko aukera ematen badu atzokoak, zer kontatu handirik ez dagoelako da. Aukera aldetik, behintzat, oso kamuts ibili ziren bi taldeak, eta berdinketa kutsuko partida bi ziztadatan bereganatu zuen Realak. Hortik aurrera, ondorioetaz aritu behar. Realari dagokionez, aspaldiko partez ez zuen golik jaso [bigarren jardunaldian bakarrik utzi zuen atea hutsean], eta albiste handia da, partidako bi gol pasatxo jaso eta gero. Eta golak sartzen segitzen du.

Alavesen inguruan, lehen baino zailagoa da bera menderatzen, eta hor eraikitzen ari da oinarria De Biasi italiarra. Baina atzo ere galdu egin zuen zaleen aurrean, eta puntu alerik atera gabe segitzen du Mendizorrotzan. Sendotasun horri ez badio gehitzen erasoko baliabide gehiago, asko kosta behar zaio puntuak hirunaka batzea, eta zuloan egonik, beharrezkoak ditu arrantza handiak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Kike Barja, gaur, jokaldi batean. ©Biel Aliño / EFE

Osasunak hutsean berdindu du Levanteren zelaian

Berria

Gorritxoek zazpi jardunaldi daramatzate irabazi gabe, baina zortzigarren postuari eusten diote. Gaur hobea izan da Levante, sailkapeneko azkena.

Urrutikoetxea eta Aranguren besarkatuta, gaur, Bilbon, Albisuri eta Peñari irabazi berritan. ©Marisol Ramirez / Foku

Bigarren garaipena Urrutikoetxea-Arangurenentzat

Berria

Ezustekoa eman eta bikote faboritoetako bati irabazi diote. Urrutikoetxea izan da partidako onena. Emakume Master Cupeko lau eta erdiko finala Miriam Arrillagak eta Amaia Aldaik jokatuko dute.

Alaveseko eta Valentziako jokalariak lehian, gaur. ©Jaizki Fontaneda / Foku

Alavesek eta Realak irabazi, Eibarrek berdindu

Paulo Ostolaza

Emaitza bikainak eskuratu dituzte gaur jokatu duten hiru euskal taldeek. Alavesek Valentziari irabazi dio (3-1), Realak Madrili (1-2), eta Eibarrek Huelvan berdindu du (1-1).

Realeko jokalariak burumakur, Real Madrilek bigarren gola sartu eta gero. ©JAVIER ETXEZARRETA / EFE

Biguntasuna ordaindu du

Ainara Arratibel Gascon

Lehen zati amaiera on baten ostean, Realak bi gol jaso ditu bigarren zatiaren hasieran, atzean gaizki zaindutako bi jokalditan. Ezin izan du suspertu. Txuri-urdinek hirugarren porrota kateatu dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.