Emakumezkoetan, Tolosaldean aparteko ilusioa dago sailkatzeko, hamar urteren ondoren trainerua berreskuratu duten denboraldian. 2008ko hartan, lehen edizioan, ez zuen lortu lau aukeratuen artean sartzea. Malen Oiarzabal arraunlariak (Tolosa, Gipuzkoa, 1999) aukerak ikusten dizkio taldeari aurten.
MALEN OIARZABAL
Tolosaldeako arraunlaria
«Mugan gaudenon artean, huts gutxien egiten duena sartuko da»
«Hankak lur gainean dauzkagu, eta badakigu zaila izango dela, baina ezinezkoa ez. Ondo prestatuta gaude, eta udan erakutsi dugu gai izan garela bandera bat irabazteko ere ETE ligan. Erlojuaren aurka irabazi genuen, eta ondo moldatzen gara gaurkoa bezalako lanetan. Oso garbi daukagu zer egin beharko dugun sailkatu ahal izateko: estropada ona egin. Hautagai dezente gaude pare bat lekutarako, eta huts gutxien egiten duenak eramango du saria. Multzo honetan Galiziako txapelduna ere sartuko nuke, Riveira, dakigunez oso indartsu datorrelako».
IÑAKI ERRASTI
Ondarroako entrenatzailea
«Orain artekoa ikusita, guk onena eginez gero, barruan behar genuke»
«Sekulako gogoarekin gaude, eta, ustez, udako sasoi punturik onenean. Hortaz, lan ona egiteko moduan gaude. Gure lana dakigun bezala egiten badugu, barruan behar genuke, orain artekoa ikusita behintzat. Baina, gerta daiteke guk gurea egin arren ere, ez sailkatzea, beste batzuek ere lan ona egin dutelako. Ez daukagu presio berezirik sailkatzeko. Gure arraunlariak horrelako egoera batean ez dira askotan egon, baina ez gaitu kezkatzen; oso zentratuta gaude gurean. Zazpigarren lekurako Kaiku, San Pedro eta gu gara hautagaiak, baina kontuz ibili Isuntzarekin, adibidez, itsaso mugituarekin asko ibiltzen delako».
XABIER OSTOLAZA
San Pedroko arraunlaria
«Badakigu zaila izango dela, baina itxaropena ere badugu»
«Animo handiarekin gabiltza. Jakin badakigu ez dela erraza izango, eta zaila dugula sailkatzea, baina, aldi berean, itxaropentsu gaude. Ezinbestekoa izango da guk gure lana ondo egitea, hori egin ezean jai izango dugulako. Hiru hautagai gaude zazpigarren lekurako: Kaiku eta Ondarroa dira beste biak. Ligan, hirurok irabazi izan diogu elkarri, eta, Ondarroak askoz puntu gehiago batu baditu ere, ez dago aparte gugandik. Kaiku menderatuko dugu guk gure lana egiten badugu. Isuntza hautagai jotzen duenik ere bada, baina ikusi egin behar da nola ariko den. San Pedro eta zortzigarren lekuaren madarikazioaren inguruan, kontu hori ez dugu askotan aipatzen gure artean».