LARREPETIT

Sukaldekoei

Maddi Ane Txoperena Iribarren -

2017ko urtarrilak 11
Bukatu dira Eguberriak Hego Euskal Herrian ere —ez zenekitenentzat, Errege magoak Bidasoaren alde batean baino ez dira ospatzen—, eta eskerrak, bai, halako batean bukatu diren! Hainbeste jan, edan, berriro jan... eta hainbeste kontsumismo, opari, familia bazkari, kaleko argi... Gustura hartzen dira, bai, baina hein bateraino.

Behin eskerrak erraten hasita, ordea, eskerrak eman behar zaizkienei zuzendu nahiko nieke zutabe hau. Haiek ere erranen zutelako «Eskerrak!», baina agian bertze modu batera. Sukaldekoei zuzendu nahi natzaie, dena ongi ateratzeko ezinbestekoak diren horiei, baina gehienetan ezkutuan, gibelean gelditzen direnei. Otordu alai eta oparoak mahai gainean izateko zer prestatu pentsatu, eta astebete lehenago erosketak egitera joaten direnei. Egunean bertan ala bezperatik sukaldean orduak pasatzen dituztenei, bertzeok poteoan, lotan ala ikasten ari garen bitartean. Bazkalorduan ipurdia aulkiaren gainean bi minutu baino gehiago eduki ezin dutenei, hamaika aldiz errepikatu arren egoteko geldi (baina badaezpada gu ez gara gehiegitan altxatzen). Eta turroia, kafea ala xanpaina dastatzen eta txiste kontaketan ala kartetan ari garen bitartean berriro sukaldera doazenei, platerak garbitzera, sukaldea txukuntzera, eta hurrengo otordurako zer egin pentsatzera, gu bestara goiz joan gaitezen inolako burukominik gabe.

Tamalez, edo agian eskerrak, etxe guztietan izanen dira horrelakoak. Gurean maiz izena dute amatxi, ama, osaba... Bertze etxe batzuetan izanen dira aita, izeba... Baina ez anitzetan seme, lehengusu...

Eta, agian, erraza da behin pasatuta halako hitzak idaztea. Agian, hobe litzateke desorekaz konturatu, eta hurrengo ospakizunetarako hobeki nola antolatu pentsatzen hastea. Gaurkoak aitortza xume bat bertzerik ez du izan nahi, ordea. Isilean egiten duzuen lan guztiarengatik, bihotzez eta zinez, milesker.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna