Musika. Chelsea Carmichael
'The River Doesn't Like Strangers'
Diskoetxea: Native Rebel Recordings.
Britainia Handiko jazz garaikidearen ekosisteman diharduen saxofonista bat da Carmichael. The River Doesn't Like Strangers estreinako lana du, eta, Sons of Kemet proiektuko taldekide Shabaka Hutchingsen laguntzaz, orainean iltzatutako jazz disko bat egin du. Batzuetan, Afrikarako bidea hartzen du —There Is You And You-ren afrobeat joera—; besteetan, Jamaika du helmugan, free jazz oldarraldiekin jantzitako Myriad doinuko dub giroak, kasurako. Erritmoari, egiturari, energiari eta melodiei erreparatzen die, doako birtuosismoaren kalterako. Urte amaierako sorpresa izan daiteke. Oraingoz, online entzun daiteke, baina urte amaieran binilozko lan bikoitza eskuratu ahalko da.
Iruzkinak
Ez dago iruzkinik
Ordenatu