'Taller'

Bost urteko isiltasunaren ondoren dator Jamie Cullumen Taller, bere etxean bertan konposatu eta grabatu duen lana. Hasierako jazz musikatik oraindik arrastorik gelditzen bazaio ere, aspaldi pasatu zen doinu poperoagoetara, publiko oraindik zabalagoarengana iritsiz; eta hala jarraitzen du, musikalki hazten eta zabaltzen. Pianoaren ezinbesteko laguntzaz, eta, hura oinarritzat hartuta, talde osoa dauka inguruan abestiak osatzeko, eta lortu du, beste behin, abesti goxo eta dantzagarrien arteko oreka lortzea, eta efektuz eta geruzaz beteriko abestiek soinu naturala izatea. Lehen aipatutako jazz eta baita soul ukituak ere bazter guztietan nabari dira, baina, azken boladan bezala, pop disko borobil baten aurrean gaude.