'Ch'usay'

Dagoeneko iritsi da talde peruarraren zazpigarren lan luzea —birnahasketekin osatutako hirurak alde batera utzita—. Orain arteko bideari eusten badiote ere —musika afro-peruarra eta elektronika uztartzea—, oraingo honetan nabarmena da hip-hoparen presentzia hainbat kantutan. Horretarako, Kumar kubatar raperoaren laguntza izan dute. Horretaz gain, Esteban Copete marinbaren maisu kolonbiarraren ekarpenak ere nabarmentzen dira, azken diskoak baino anitzagoa gertatzen den Ch'usay honetan. Hamabost urte bete ditu taldeak, horren harira kaleratu dute disko berria. Maila mantentzen jarraitzen badute, iraundezatela beste hamabost urte, benetan.