'All Mirrors'

All Mirrors lan berrian, Angel Olsenek abestiak ispiluaren barnera begira egin dituela dirudi. Argitaratu duen disko bakoitza beste guztietatik ezberdina izan da, batetik bestera haziz, eta orain ere bere burua hobetu du. Inoiz baino hauskorrago eta inoiz baino intimistago ageri zaigu, baina, era berean, inoiz baino instrumentu eta sintetizadore gehiago erabiliz. Daukan ahots berezia bikain aprobetxatzen jakin du, erregistroekin jokatu eta abesti bakoitza alde batetik edo bestetik bideratzeko, betiere koherentzia mantenduz, disko oso bat lortuz. Horrela, argi utzi digu edozertara moldatzeko gai den artista dela, eta abesti ilun bezain goxoak naturaltasun eta edertasun berarekin sortzen dituela.