Balentria egin beharko du Eibarrek mailari eutsi nahi badio. Atzo, berriz galdu zuen, Granadan (Espainia), 4-1, eta beste atzerapausoa eman zuen. Sei jardunaldiren faltan, bost puntura du salbazioa. 23 puntu ditu, eta 28 Valladolidek, baina hark partida bat gutxiago jokatu du. Zuloaren zuloan dago Eibar, eta burua altxatu ezinik. Hamabost jardunaldi daramatza jada irabazi gabe.
Hamaikagarren kolpea jaso zuen atzo. Atsedenaldian jada maldan gora zuen lehia: 2-0. Soldadok egin zuen lehen gola, 21. minutuan, eta Puertasek, bigarrena, 38.ean. Eibarrek ezer gutxi egin zuen. Bigarren zatian, ordea, gogotsu zelairatu zen, eta aukerak sortzen hasi zen: Diopek, Sergio Alvarezek eta Pedro Leonek; azken horrek oso argia. Laugarren ahaleginean sartu zuen gola Kike Garciak, 64. minutuan. Gertu izan zuen binakoa ere. Baina gehien estutzen ari zirenean sartu zuen hirugarren gola Granadak, 76. minutuan, Soldadok berriro. Lau minutu geroago, berriz, Kenedyk laugarrena sartu zuen, eta Eibarri errematea eman.
Eibarrek 4-1 galdu du Granadan, eta ezin du zulotik atera
Iruzkinak
Ez dago iruzkinik
Ordenatu