Noiz sortua: 2020-03-19 00:30:00

Seriea. Sagardogileak (I)

Jarri freskatzen

Botilako sagardoak jauzia egin nahi du «merkatu berrietara»: Euskal Herri osora zabaldu nahi du, eta, bereziki, gazteen artean. Sektorearen inguruan erreportaje serie bat kaleratuko du BERRIAk datozen egunetan.

Jokin Sagarzazu -

2020ko martxoak 19

Lehenengoetarikoak izan ziren euren negozioak ixten. Eta, besteek bezala, ez dakite noiz zabalduko dituzten berriro. Oraindik goiz da jakiteko koronabirusaren krisiak nola eragingo dien, baina kolpe latza jasoko dutela argi dute sagardogileen elkarteek. Haiena sagardoaren produkzioa gainditzen duen sektorea baita.

Izan ere, sagardogileek euren etekinen %60 inguru lortzen dute ostalaritza zerbitzuetatik, txotx garaian zein urte osoan eskaintzen dituztenak. «Hori da gure diru sarrera nagusia; hori gabe, sagardo ekoizle askok itxi egin beharko lukete», azpimarratu du Ibon Aburuza Gipuzkoako Sagardogileen Elkarteko lehendakariak. Oraingo etenak eragingo dien zulo handia nola bete aztertzen ari dira: botilen salmentarekin soilik ezinezkoa izango dutela badakite, baina, neurri batean, beste erremediorik ez dute. Botilari bultzada berri bat emateko ere baliatu nahi dute egoera berria.

Euskal Herrian produzitzen den sagardoaren %86 botilatzen da; bestea, zuzenean kupeletik kontsumitzen da; txotx garaian, bereziki. Aurtengo uzta kontuan hartuta, gutxienez, 10,5 milioi litro komertzializatu beharko dute; eta gehiago ere izan daitezke, sagardotegi garaiaren etena dela eta. Eta diru asko dago jokoan. Gipuzkoako Foru Aldundiak emandako datuen arabera, botilako sagardoak 15 milioi euro fakturatzen ditu urtean; Euskal Herriko edari produkzioaren %15,7 da hori.

Unai Agirre Euskal Sagardoa jatorri izenaren kudeatzaileak azpimarratu duenez, koronabirusaren krisiak «trantsizio garai batean» harrapatu ditu sagardogileak: «botila indartzeko garai batean». «Lehen, txotxa egiten zen botilan zer sartu erabakitzeko; hortik sortu zen egun dugun esperientzia gastronomikoa. Baina horrek egokitu behar du».

Gertatzen ari den edo egin nahi den aldaketarekin bat dator Aburuza. «1990eko hamarkadetan egin zen saltoa: ostalari bihurtu ginen. Baina ahaztu egin genuen botila, ez genuen landu; behar duen tokia ez genion eman. Orain, bigarren jauzi baterako garaia da: oreka bilatu behar dugu ostalaritzaren eta botilaren artean». Agirrerentzat, argi dago zein den gakoa: «Kontsumitzaile berriak lortzea. Eta, horretarako, sagardoa bera izan behar da ardatza. Botilara itzuli behar gara, eta jakin behar dugu merkatuan birposizionatzen».

Saltzera irten

Aburuzak azpimarratu duenez, azken urteetan sektoreak inbertsio handiak egin ditu helburu horri begira, eta «asko profesionalizatu» da, produkzioan eta kontserbazioan, bereziki. Komertzializazioaren alorrean ikusten du hutsune nagusia. «Asko aldatu da. Lehen, sagardotegian erosten zuen jendeak, eta urte osorako. Orain, ez. Barietatea nahi dute: aldatu, probatu...». Horrekin bat dator Agirre. Sagardo produktoreen erronka nagusia hori dela azpimarratu du. «Saltzera atera behar dugu: merkatuak nola funtzionatzen duen eta nola saltzen den ezagutzera. Ari gara horretan».

Agirrek esandakoaren harira, Aburuzak «aldaketa handi bat» nabaritu du urteotan; bereziki, 2017an Euskal Sagardoa sor-marka sortu zenetik, eta, horrekin batera, instituzioen laguntzak «handitu» direnetik. «Berpizten ari da botila. Prestigioa eman zaio produktuari, eta erraztu da komertzializazioa». Agirrek gaineratu du «aldaketa handiko urteak» izaten ari direla sektorean: sagarraren ekoizpenetik hasita, eta ikerkuntzan, produkzioan eta merkaturatzean ere bai. Hein handi batean, berak ere azpimarratu du sor-markaren sorrerak eragin duela hori. Instituzioen babesari dagokionez, Agirrek argitu nahi izan du laguntzak ez direla mugatu merkaturatzera soilik, produkzio prozesu osora zabaldu direla. «Eta horrek eragin handia izan du kalitatean. Gaur egun, kalitate handiko produktua ari gara ekoizten».

Aurrera begira, sagardogileek bi erronka dituzte, Agirreren arabera: merkatua zabaltzea eta prezioa «kalitateari egokitzea». «Bertako merkatua ondo landu da, baina gehiago egin daitekeela uste dugu: dendetako linealetan ondo posizionatu behar dugu, eta ostalaritzan gehiago sartu behar garea: sagardo kartak sortuz, azalpenekin-eta, adibidez». Agirrek uste du sagardoak baduela merkatua, «potentzialtasun handiko» produktua delako. «Gurea da, Euskal Herrikoa, arina da, graduazio txikikoa...».

Gazteak erakartzea

Aburuzak, baina, zailtasun ugari ikusten ditu oraindik Gipuzkoatik kanpo saltzeko. «Ari gara, baina erronka bat da oraindik Euskal Herri osora iristea, Euskal Herriko merkatua sendotzea». Geografikoaz gain, badute beste erronka bat, Aburuzaren ustez: kontsumoa «urte osora» zabaltzea. «Lortu behar dugu sagardoa ez izatea soilik txotx garaian edo ospakizun jakin batzuetan kontsumitzen den produktu bat».

Aburuzak gazteengan jarri du begirada. Azpimarratu du botilak saltoki handietan ikusgarri jarri izanak eta sagardoak Agirrek aipatu dituen ezaugarriak izateak kontsumoa handitu duela. Horren harira, Agirrek garagardo egileek gazteak erakartzeko egiten ari diren lana azpimarratu du. «Ispilu interesgarria da guretzat marketinaren alorrean, diseinuan, produktu aniztasunean eta beste egiten ari direna».

Upategiak ere aipatu ditu Euskal Sagardoa sor-markaren kudeatzaileak. «Lan handia egin dute ostalaritza eta produkzioa uztartzen, eta, bereziki, sor-marken alorra lantzen, mahatsen aniztasuna eta produkzio moduetan ikertzen....».

Agirreren ustez, kalitatean jauzia egiteak ekarri beharko luke sagardoaren prezioa «duintzea» eta sektoreko beste langileen lana ere; bereziki, sagar ekoizleena.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Maiatzaren 29an eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan lau pertsona hil dira COVID-19 gaitzaren eraginez, 22 positibo atzeman dituzte PCR probekin, eta bi gaixo ospitaleratu dituzte. Euskal Herrian 29.107 gaixok eman dute positibo guztira, koronabirusa atzemateko probaren bat eginda. Horietatik 2.056 hil dira. Grafikoak, albiste barruan.

Araban, Bizkaian eta Gipuzkoan Lanbide arduratuko da errenta berria banatzeaz. ©JUAN CARLOS RUIZ / FOKU

Iritsi da bizitzeko gutxieneko diru sarrera, muturreko pobrezia murrizteko

Irune Lasa

Espainiako Gobernuak diru saria onartu du, eta ekainean bertan hasiko da ordaintzen. Hegoaldean, Eusko Jaurlaritzak eta Nafarroako Gobernuak kudeatuko dute

Donostiako Zurriola hondartza, atzo. ©Gorka Rubio / FOKU.

Murgak ohartarazi du ezin direla errepikatu hondartzetan ikusi diren irudiak

Maddi Ane Txoperena Iribarren

Jende pilaketak saihesteko eta hondartzen erabilera «dinamikoa» egiteko eskatu du Eusko Jaurlaritzako Osasun sailburuak. Aisialdirako bada, garraio publikoa ez erabiltzeko eskatu du, «jende asko dagoenean».

Haur bat, jolas parke baten ondoan, Zarautzen. / ©Gorka Rubio, Foku

Eguneko udalekuak baimenduko dituzte hirugarren fasean Hegoaldean

Jon Ordoñez Garmendia

70 urtetik gorakoentzako ordutegiak desagertuko dira. Hogei pertsona arte elkartu ahal izango dira, baina ezingo da probintziatik atera oraindik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna