Paramyxoviridae familiako birus baten infekzioak eragiten du elgorria. Hemen, gaixotasunari buruzko hainbat datu.
Txertoak indargabetu du
Oso gaitz kutsakorra da. Haren aurkako txertoa 1963an sartu zen osasun sisteman, eta txertaketa kanpainek milioika hildako eragotzi dituzte. Txertoa eskuragarri izan aurretik, bi eta hiru milioi lagun artean hil zitezkeen urte bakarrean, izurriteen ondorioz. Horregatik, aditu askok osasunaren alorrean egindako aurrerapen nagusien artean kokatzen dute elgorriaren aurkako txertoa. OMEren datuen arabera, 21,1 milioi pertsona inguru hiltzea eragotzi zuen 2000 eta 2017aren artean.
Herrialde txiroetan, larriagoa
Elgorriak toki behartsuetan eragiten ditu hildako gehien; Afrikako eta Asiako herrialdeetan, batik bat. Horrez gain, izurriteek kalte handiak sortu ditzakete hondamendi naturalak edo gatazkak jasan dituzten guneetan: osasun zerbitzuen eta azpiegituren gabeziak immunizazio sistematikoa galarazten dute, eta errefuxiatuen kanpalekuetan izaten diren jende pilaketek infekzioa errazten dute.
Ez dauka tratamendurik
Ez dago elgorriaren aurkako botika antibiralik; gaitza neutralizatzeko, elikadura egokia mantentzea eta likidoak hartzea gomendatzen du OMEk, deshidratazioari aurre egiteko. Haurren kasuan, lagungarria izaten da A bitamina duten elikagaiak hartzea, eritasunak A bitamina murrizten baitu.
ELGORRIA
Iruzkinak
Ez dago iruzkinik
Ordenatu