Musika, dantza eta magia, azken saioetarako

Koronabirusa hedatzen hasi eta kultur sortzaileentzako plazak itxi zituztenean ireki zuen egunkari honek BERRIA Aretoa, kulturgileentzako plaza, bere webgunean. Etzi, asteartean, amaituko du bere bidea egitasmoak, eta musikarien, idazleen, artisten, ipuin kontalarien, bertsolarien eta bestelako diziplinetako sortzaileen 120 saiotik gorako uzta utziko du.

Horretara iristeko, baina, hainbat saio gelditzen dira oraindik. Gaur, Makulu Ken afrobeat taldearen saioa izango da 10:00etan, eta Garazi Etxabururen eta Josu Eizagirreren dantza emanaldia, 18:00etan. Bihar, Jon Sarasua eta familia ariko dira kantuan, eta Edurne Saizar pianistaren saioa ere izango da.

Bukatzeko, asteartean, beste saio bat egingo dute Etxaburuk eta Eizagirrek, eta, ondoren, beste bi emanaldi izango dira, Ion Arruabarrena musikariarena eta Imanol Ituiño magoarena.