Harmonia leunetan jasotako pasarte gazi-gozoak

Estilo amerikarreko taldea da The Parson Red Heads. Folk-rock melodia atseginen atzean, geruza askoko abestiak dituzte, psikodeliara gerturatzen diren pasarteekin.

Hamabost urteko ibilbidearen ondoren, Blurred Harmony laugarren lan luzea argitaratu zuten duela urte eta erdi. Askotariko harmoniak biltzen dituen lan heldua da, eta gitarra hots neurtuekin puskatzen ditu gozotasunez sortutako kanta garbiak.

Porlandeko (AEB) boskoteak udazken giroko lan kontzeptuala aurkeztuko du Bilboko Kafe Antzokiko Kutxa Beltzean. Donald Justicen poema batetik abiatu zuten diskoa, eta itxura atsegineko doinuen atzean jaso dute bizitzaren gazi-gozoa.

Entzunaldi lasaietarako diskoa izanagatik ere, taldeak magia bereziarekin eramaten du ondo zaindutako zuzenekora.