Ahots urratuak, gitarra sendoak eta oinarri erritmiko indartsua. Punk-rocka egiten du Tarragonako (Herrialde Katalanak) Crim taldeak, ez gehiago, ezta gutxiago ere. 2011. urtean sortu zuten taldea, eta bost disko kaleratu dituzte.
Estiloak berezko duen basakeria guztia jasotzen dute haien kantek, hitz zorrotzekin, melodia kantagarriekin eta gitarraren pasarte bertutetsuekin. Pare nostre que esteu a l'infern diskoa kaleratu zuten iaz, eta hura aurkezten ariko dira Arrasaten (Gipuzkoa). Batzuetan hardcoretik hurbilago, besteetan ia oi! estiloan, batetik bestera kolpeka eramateko gai da Crimen musika.
Arrasateko Kooltur Ostegunen aurtengo denboraldiko azken kontzertua izango da ostegunekoa. Indartsu bukatuko dute kontzertu sasoia, Kataluniako punk eszenari astindua eman dion taldearekin.
Musika. CRIM
Poserik gabeko punk-rock gordina
Non: Arrasateko gaztetxean (Gipuzkoa). Noiz: Ostegunean.
Iruzkinak
Ez dago iruzkinik
Ordenatu