Euskara sustatzeko akordioa izenpetu dute kostaldeko ospitaleek eta EEPk

Hiru urteko hitzarmenak seinaleak itzultzea eta euskara erabiltzea bultzatuko du.

Artatzean hizkuntza garrantzitsua dela ohartarazi dute
Michel Glanes eta Frantxua Maitia, atzo, Baionan.
Michel Glanes eta Frantxua Maitia, atzo, Baionan. BOB EDME

Maddi Ane Txoperena Iribarren -

2015eko urtarrilak 8
Euskararen Erakunde Publikoak (EEP) eta Euskal Kostaldeko Ospitaleek osasunean euskara bultzatzeko hitzarmen bat izenpetu dute. Bertzeak bertze, idatzizko dokumentu gehienak euskaratu eta euskaraz dakiten langileei euskaraz artatzeko baliabideak eman nahi dizkiete akordio horren bidez, gaixoei zerbitzu hobea emateko helburuarekin. «Erien eta bisitarien harrera hobetzeko asmoz, arreta berezia eginen zaio euskararen erabiltzeari gaixoekiko harremanetan, kontsideratzen delako integrazioa eta konfiantza lortzeko bektore garrantzitsua dela hizkuntza», adierazi dute Frantxua Maitia EEPko lehendakariak eta Michel Glanes Euskal Kostaldeko Ospitaleetako zuzendariak, elkarrekin izenpetutako adierazpenean.

Hiru urterako balioko du atzo Baionan aurkezturiko hitzarmenak, eta bi aldeek adierazi dutenez, betetzera engaiatuko dira. Hain zuzen, zehaztu dute adostutakoa egin ezean elkar sala dezaketela, eta afera Paueko Administrazio Auzitegira eraman. Dena den, hori ez gertatzea da helburua, eta euskarazko osasun sistemaranzko urratsak egiten hasiko dira, tartean Baionako eta Donibane Lohizuneko erietxeetan. Horretarako, bertzeak bertze, seinaleak euskaraz idatzi, webgunea euskaratu, prebentzio kanpainak euskaraz egin eta erietxeetako langileei euskara erabiltzeko laguntzak emanen dizkiete —prestakuntza indartuko dute, adibidez—. Jarraipen batzorde bat ere osatuko dute, urtean behin bederen bildu beharko dena, emandako pausoen balorazioa egiteko.

EEPk, berriz, diru laguntza progresibo bat emanen dio Euskal Kostaldeko Ospitaleei, neurriak har ditzaten: 3.000 euro lehen urtean, 2.000 bigarrenean eta 1.000 hirugarrenean; ospitaleak bere baitarik neurriak hartzen joatea da asmoa. Laguntza teknikoa ere emanen dio.

Langileak boluntario

Izenpeturikoa ez dute bakarrik egin nahi EEPk eta ospitaleek; horretarako, inkesta bat eginen dute langileen artean, euskara bultzatzeko gogoz daudenak aurkitzeko, boluntario izan daitezen. Materiala ere prest dute, lehen hitza euskaraz izatea errazteko: Nahi baduzu euskaraz dioten txapak eta mahaietarako txartelak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna