Orokortu gabeko kontzeptu bat da indarkeria obstetrikoa, baina zabaltzen ari da pixkana.
Zer dio OMEk?
Askotariko tratu txarrak. Osasunaren Mundu Erakundeak erditzeetako tratu txarrez egindako txostenak dio egoera «asaldagarria» dela, emakume askok sufritzen baitute «tratu iraingarri, axolagabe eta errespeturik gabea». Tartean aipatzen ditu umiliazioak, prozedura medikoak baimenik gabe erabiltzea, tratu txar fisikoak, informatutako onespena lortzeko beharra ez betetzea, pribatutasuna urratzea... Giza eskubideen urraketatzat dauka, eta nabarmendu du emakumeak «bereziki zaurgarri diren une batean» egiten dela.
Zer diote gidek? Erditze arruntetako arretari buruzko hainbat gida plazaratu dituzte azken urteetan. Hona gomendio batzuk:
Tratua. Erditzen ari den andrea konfiantzazko senide batek lagunduta egotea, intimitate giroa zaintzea, eta errespetu handienarekin tratatzea.
Erditzea. Dilatazio fasean emakumea mugitu ahal izatea —etzanda egotera ez behartzea—, eta egozte fasean jarrera erosoena hartzea, likido argiak edatea, bagina miaketak etengabe ez egitea, indarra modu naturalean egitea...
Jaiotza. Haurra jaiotzean, ama eta umea ez banatzea, eta edoskitzea ahalik eta azkarren hastea.
Saihestu beharrekoak. Ur poltsa artifizialki haustea, oxitozina ematea dilatazioan, perineoko ileak kentzea, episiotomia egitea...
PUNTUZ PUNTU
Iruzkinak
Ez dago iruzkinik
Ordenatu