Musika. The Black Lips
'Sing In A World That's Falling Apart'
Diskoetxea: Fire Records/Vice.
Atlantako boskotea cowboy mozorrotuen eta countryaren lokatzetan sartu da. Basatza horretatik baina, garbi-garbi atera da, sekulako diskotzarra argitaratu baitu AEBetako taldeak—urte hasieran entzun dudan diskorik ederrena iruditzen zait—. Grabazioak AEBetako hegoaldean errotutako dozena bat doinu mozkorti biltzen du. Dylanek eta Stonesek bestondoarekin grabatuko balituzte bezala, balantzaka eta arrastaka ateratzen baitira bozgorailuetatik. Halere, belarri zorrotza duen entzuleak antzemango du klasikotasun hori konponketa garaikideekin janzten jakin duela boskoteak, edo, lagun min batek bota didan bezala: «LSDa hartu duen Gram Parsons, Captain Beefheartekin jotzen».
Iruzkinak
Ez dago iruzkinik
Ordenatu