'Warsaw Afrobeat Orchestra'

Hau omen da Poloniako afrobeat talde bakarra. Ezin ziurtatu, baina ez litzateke harritzekoa. Baina, era berean, talde honen laugarren lan luzea, 1960ko hamarkada amaieran, Nigerian, Fela Kuti eta enparauek sortutako musikaren bilakaera unibertsalaren seinale da. Egia esateko, murriztailea da taldearen musika genero horren koordenadetan bakarrik kokatzea. Badira eragin asko disko honetan, baita 1980-1990eko hamarkadetako world-music delakoarena, edo XXI. mendean loraldi berri bat ezagutu duen afro-rock musikarena ere. Laburtzeko, oinarrian funk musika sendoa dago, eta hamaika modutara janzten dute. Irudimena ez zaio falta diskoari, ezta gutxiagorik ere, eta emaitza indartsua da.