'Meadow Flower'

Estilo eta soinu ezberdinen arteko uztarketatik batzuetan formula interesgarriak sortzen direla erakusten du Seattle hiriko bikotearen belardiko lore honek; izan ere, Carolyn Brennan eta Ian Corrigan (Gen Pop, Vexx) musikariek indie militante eztia eta punk sustraidun zarata mingarria nahastu dituzte zortzi kantu erakargarritan, Talula Gosh eta Black Flag masa itsaskor batean batuko balira bezala. Hala, C86 estiloko giroak hardcore burrunban biltzen dituzte hogei minutu eskas irauten duen estreinaldi zirraragarri honetan; jangle-punk izendapena primeran egokitzen zaie. Orbain gogoangarri baten xarma haizatzen du.