Babesa laguntza bihurtzera

Egunotan jasotako babesa laguntza bihur dadila eskatu du BERRIA Taldeak. Eusko Jaurlaritzaren diru laguntzetan izandako murrizketen berri jakin zenetik—210.000 euro gutxiago emango dizkio aurten euskarazko kazeta nazionalari, iazko ekarpena baino %14 urriago—, atxikimendu mezu ugari jaso du BERRIAk. Besteak beste, egunkaria babesteko kanpainak ia 15.000 sinadura bildu ditu. Taldeak eskerrak eman dizkio euskal gizarteari, eta sostengu horretan urrats bat gehiago egitera deitu ditu irakurleak: «Egunotan agerian geratu denez, milaka lagunek nahi dute BERRIAk bere bidea egiten jarrai dezan, eta, horretarako, ezinbestekoa izango da BERRIA sostengatzen duen komunitatea zabalduz joatea».

Hain justu, Jaurlaritzak diru laguntzak gutxitzea erabaki duen honetan, BERRIA Taldeak nabarmendu du «inoiz baino garrantzitsuagoa» dela BERRIAlagunen dinamikari eustea. Euskarazko kazetak 2011n abiatu zuen laguntzaileen komunitatea ehuntzeko bidea. Hedabideek XXI. mendean duten abagunean, bideragarritasuna bermatzea du xede BERRIAlagunen egitasmoak: «Jakina da egunkariak erosteko ohitura gutxitzen ari dela, baina gero eta irakurle gehiago ditugu. Beraz, dei egin genien bakoitzak bere ekarpena egin zezan». Izan ere, irakurle bakoitzak urtean 100 euroren ekarpena egingo balu, ekonomikoki bideragarria litzateke BERRIA, «eta, berrikuntza zein garapenerako aukerak sortzeaz gain, sarean doako izaten jarraituko luke».

Egun, urtean ekarpen ekonomikoa egiten dutenak, harpidedunak eta BERRIAlagun iragarleak batuta, 13.000 pertsonak osatzen dute BERRIAlagunen taldea; 2015erako 15.000ra heltzea nahi luke BERRIAk. Komunitatea handitzea da helburua: «Lagun berrien ekarpena lortu nahi dugu, ez ekarpena egiten dutenek diru gehiago jartzea».

Helegitea ebazpenari

Bestalde, BERRIA Taldeak gogora ekarri du euskal gizartearen sostengua ezinbestekoa izan dela euskarazko kazeta nazionalaren ibilbidean zehar: «Herritarren etengabeko laguntzak eta babesak egin du proiektu hau posible, garairik zailenetan ere. Babes horrek balio handia du eguneroko lanean jarraitzeko». Eta balio handia izango du aurrerantzean ere, Jaurlaritzaren murrizketak direla-eta eman beharreko pausoen harira. Izan ere, diru laguntzen ebazpenari helegitea jartzea erabaki du BERRIAko zuzendaritzak. «Datozen egunetan gauzatuko da, Eusko Jaurlaritzatik beharrezkoa den informazioa jaso eta adituen zein legelarien txostenak eskuratu ondoren».

Jaurlaritzak irizpideak aldatuta banatu ditu aurten diru laguntzak. Irismenaren irizpidea txertatu du lehen aldiz, eta puntuetan %70eko pisua eman dio. BERRIA Taldeak gogora ekarri du laguntza politika horrek «babes instituzional nahikorik gabe» utzi duela BERRIA.