Albistea entzun

Izurtza

Bi asteburuz, hiru baselizatan

Gaurko txupinazoak emango die hasiera Izurtzako jaiei, eta irailaren 13ra arte iraungo du festak
Musika eta dantza ez da faltako aurten ere Izurtzako jaietan.
Musika eta dantza ez da faltako aurten ere Izurtzako jaietan. IZURTZAKO UDALA

Ander Gartzia Badiola -

2015eko irailak 4

Bi asteburuz jarraian murgilduko da festa giroan Izurtza (Bizkaia). Gaur 20:00etan hasiko dira jaiak, orduan botako baitu herriko aguazilak suziria udaletxeko balkoitik. Eztandarekin batera lehertuko da festa, eta gaztelekuan joko duten musika taldeak arduratuko dira giroa berotzeaz.

Martxak ez du etenik izango hurrengo egunetan Izurtzan. Bihar, esaterako, paella ontzien ondoan batuko dira herritarrak, goizean egingo den txapelketaren ostean elkarrekin bazkaltzeko. Arratsaldea, berriz, bingoan jokatuz emango dute izurtzarrek. Egun nagusia igandean ailegatuko da, Santa Ageda egunarekin batera. Oihane Irastorza kultur zinegotziaren esanetan, «egun ederra da, giro ezin hobea sortzen baita han goian». Santa Ageda baselizaz mintzo da, egun horretan Izurtzako jaien epizentro bihurtuko dena. Izan ere, udalak herriko auzo eta ermita guztiak hartu ditu kontuan egitaraua osatzerako garaian.

Santa Ageda baselizaren ondoan egingo den herri bazkaria izango da eguneko ekitaldirik garrantzitsuena. Hala ere, goizean goiz Jaizde taldeak antolatuko duen kalejirak girotuko ditu bazterrak, eta, bazkaltzera eseri aurretik, Iratxe Ibarra, Oihana Bartra eta Erika Lagoma bertsolariak arituko dira kantuan. Bazkalostean, ezustekoak iritsiko dira. Aurrena, Ertz magoaren eskutik; ondoren, herri apustua. «Azken momentura arte ez dugu jakiten ze apustu mota egiten duten herriko gazteek», dio Irastorzak. Galtzaileek, baina, ez dute arduratuta egoteko motiborik: «Saria nahiko sinbolikoa izaten da. Adibidez, urteren batean, eskegi izan dute pernila zuhaitz batean, jendeak ze alturatara zegoen asma zezan. Gutxi jokatzen da, eta sari gisa, esaterako, pernil hori irabaz dezake irabazleak».

Asteartean, berriz, Andra Mari baselizara lekualdatuko da festa, eta haurren txanda ailegatuko da. Hainbat jolas egingo dituzte arratsaldean, eta pailazoen konpainiarekin gozatzeko aukera izango dute.

Antzerkia, gaur zortzi

Hurrengo asteburua ere ekintzez betea etorriko da. Irastorzak, guztien artean, bi nabarmendu ditu. Bata, gaur zortzi Muxikako 50 emakumek antzeztuko duten Errautsetatik eme lana, Onintza Enbeitia duena arduradun, eta Euskal Herriko sorginen inguruan hitz egingo duena. Bestea, berriz, datorren larunbatean egingo den tortilla txapelketa. «Giro ederra egoten da tortillen egunean. Arratsalde-pasa polita da bazkaldu eta dantzan egiteko. Izurtzako jaiak ezagutzen ez dituenarentzako, egun borobila da». Irailaren 13an, San Tomas baselizan ospatuko dute eguna, adineko jendeari eskainitako hainbat ekintzekin.

Berrikuntzarik ere badago. Abenduko zubian argazki erakusketa bat antolatzeko asmoz, argazki lehiaketa jarri du martxan udalak. Parte hartzaile bakoitzak, gehienez, jaietako hiru argazki aurkeztu ahal izango ditu. Eta, aurkeztu dituzten jaietako kartel guztien artean, Marina Barandikarena saritu dute, «herriko jaien izaera parte hartzailea ederki deskribatzen duelako».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAIZKI FONTANEDA / FOKU

«Guztiok gatoz leku beretik: guztiok gara afrikarrak»

Unai Etxenausia

'Geu, afrikarrok' aurkeztu du Arrosagaraik, zenbait gazteren istorioak biltzen dituen erakusketa bat, Gasteizko Montehermoso kulturunean. Otsailaren 26ra arte egongo da ikusgai.
Madrilgo komentu batean

'Marten' hegaldia

Enekoitz Telleria Sarriegi

Francoren erregimenak, Eliza katolikoarekin batera eta Australiako Gobernuarekin tratua eginda, ehunka euskal emakumezko bidali zituen Australiara, 1960ko hamarkadan. Han lana eginaraztea eta aurretik hara bidalitako gizonezkoekin ezkonaraztea zen bidaia haien benetako helburua. 'Marta plana' deitu zioten, eta 'El avión de las novias' dokumentalean jaso dute.

«Misiolari gisa bidali nahi gaituzte»

«Misiolari gisa bidali nahi gaituzte»

Enekoitz Telleria Sarriegi

Natalia Ortiz ikerlariak, besteak beste, Josefina Erezuma bizkaitarraren istorioa jaso du bere ikerketan, Jaime Aberasturi senargaiarekin izan zuen eskutitz trukearen bidez.

 ©OIER ARANZABAL

«Audio plataforma bat sortuko dugu datozen hilabeteetan»

Urtzi Urkizu

Ikus-entzunezkoetarako Primeran iritsiko den moduan, irrati eta audioetarako beste plataforma bat sortuko dute, Goñik iragarri duenez. «Kolaborazioak sustatuko ditugu euskalgintzarekin».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Informazio osagarria

Iruzkinak kargatzen...