Albistea entzun

Taldearen ispilua da

Adnan Januzajen aldartea nolako, Realarena halako: Belgikakoa ondo ari denean, halatsu dabiltza txuri-urdinak; eskas dabilenean, igarri egiten dio Imanolen taldeak.
<b>Adnan Januzaj, Anoetan, Leganesen aurkako partidan. Etxetik kanpo darabilten elastikoarekin aritu ziren txuri-urdinak egun hartan.</b>
Adnan Januzaj, Anoetan, Leganesen aurkako partidan. Etxetik kanpo darabilten elastikoarekin aritu ziren txuri-urdinak egun hartan. JUAN CARLOS RUIZ / FOKU Tamaina handiagoan ikusi

Jon Ander De la Hoz -

2019ko martxoak 20

Batzuetan kaleko, besteetan baleko. Reala ondoen zebilela zirudienean, Europarako postuetara ailegatzeko egiteko moduan, hiru partida jarraian lotu ditu irabazi gabe, eta moztu egin zaio orain arteko bilakaera ona.

Txuri-urdinen bolada hori taldeko zenbait jokalariren aldartearekin parekatu daiteke. Adnan Januzaj da haietako bat; zaleen gozagarri eta ernagarri izan daiteke Belgikako jokalaria. Datuei erreparatuz gero, hura zelaian denean biltzen ditu puntu gehien Donostiako taldeak. Gironaren aurka aritzeko atarian min hartu zuen 1995. urtean Bruselako Molenbeek auzoan jaiotako erdilariak, eta Realak hutsean berdindu zuen. Atletico Madrilen aurkako neurketa ere harmailatik ikusi behar izan zuen, eta donostiarrek galdu egin zuten. Ordura arte zortzi partida zeramatzaten galdu gabe.

Jipoia are handiagoa izan zen Sevillaren aurka: espainiarrek bost gol sartu zizkieten txuri-urdinei, eta egun hartan Mikel Oiartzabal izan zen Realaren argiune bakarra; Januzaj azken ordu erdian aritu zen, baina ezer gutxi egin zuen. Erritmo faltak zigortu zuen lehia hartan.

Alabaina, iragan ostiralean itzuli zen Realaren hamaikakora, eta, gorputzaldi onak iraun zion bitartean, hura izan zen donostiarren itsasargia. Lehen zatian, bere gain hartu zuen taldearen jokoa; arrisku handiena sortu zuen jokalaria izan zen, eta berak sartu zuen etxekoen gol bakarra. Sasoi honetan sartu duen estreinakoa izan zen. Lehen zatian, bere maila onaren printzak azaleratu zituen. Bigarrenean, ordea, azken partidetako geldialdia nabaritu zitzaion jardunean, eta, gutxika-gutxika, itzali egin zitzaion distira. Belgikakoak akituta amaitu zuen neurketa, eta haren nekearekin batera ilunduz joan zen Realaren ortzimuga ere, harik eta Levantek gol bat sartu eta Anoetatik puntu bat eraman zuen arte.

Gauzak horrela, bistakoa da Januzajen jardunak Realaren jokoan duen eragina. Hura ondo ari denean, taldeak igarri egiten dio, eta emaitzetan islatu egiten da hori. Hamabi partidatan aritu da hasieratik: neurketari hasieratik ekin dioenetan, aritzen ez denetan halako bi puntu lortu du Realak, batez beste. Alegia, hamaikakoan izan den partida gehienetan garaipena eskuratu dute donostiarrek; ez, ordea, aulkian edo min hartuta egon denetan.

Halaxe ekin zion sasoiari belgikarrak, min hartuta. Munduko Kopa jokatzen ari zela, min hartu zuen entrenamendu batean, Belgikako selekzioko taldekide Romelu Lukaku belaun gainera erori baitzitzaion. Ekainean izan zen hori, eta urriaren amaieran itzuli zen zelaietara.

Ordutik ia itzuli osoa egin zuen jokatzeko moduan, eta tarte horretan bi aurpegiko jokalari gisa azaldu zen zelaian. Bizi aritzen zenean, taldearen jokoak ere erritmo biziagoa izaten zuen, eta, itzalita zegoenean, astun aritzen ziren txuri-urdinak. Januzaj nola, taldea hala.

Hargatik, Imanolen etorrerak, taldearen dinamika ez ezik, Belgikakoaren aldartea ere hobetu egin zuen. Harengandik espero zen maila onenetik urrun, baina bere printzak erakusten hasi zen. Levanteren aurkako lehen zatian erakutsitako mailari eusten badio, Realak eskertu egingo du. Gaur-gaurkoz hori da Januzajen helburu nagusia: segidari eutsi, eta bere distira guztia zelaian etenik gabe erakustea.

Azken urratsaren zain

Izan ere, Januzajen ibilbidearen ezaugarri nagusia horixe izan da, segidarik eza. Oso gazterik egin zuen Manchester United talderako urratsa, gerora Realeko prestatzaile izango zen David Moyesen eskutik. Europako izar handien pare izateko kinieletan agertu zen, artean adingabea zela. Horrek baldintzatu egin dio ibilbidea, eta fokupean jarri du haren jarduna.

16 urterekin iritsi zen Ingalaterrara, eta ezin hobeto hasi zuen Manchesterreko ibilibidea. Lehen taldearekin hasieratik aritu zen estreinako neurketan, bi gol sartu zituen, eta esperantza handia sortu zuen. Ryan Giggs historikoa ordezkatzea zuen xede, baina zama handia zen hori Januzajentzat.

Alemaniako Ligara joan zen gero, utzita: Borussia Dortmundera, hain zuzen ere. Ingalaterrara bueltan, Moyesen esanetara aritu zen berriz ere; orduko hartan, Sunderlanden. 2017ko udan iritsi zen Realera, eta ordutik bere distira guztia azaleratu nahian dabil. Azken urratsa egitea falta zaio oraindik, ordea.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Kike Barja, gaur, jokaldi batean. ©Biel Aliño / EFE

Osasunak hutsean berdindu du Levanteren zelaian

Berria

Gorritxoek zazpi jardunaldi daramatzate irabazi gabe, baina zortzigarren postuari eusten diote. Gaur hobea izan da Levante, sailakpeneko azkena.

Urrutikoetxea eta Aranguren besarkatuta, gaur, Bilbon, Albisuri eta Peñari irabazi berritan. ©Marisol Ramirez / Foku

Bigarren garaipena Urrutikoetxea-Arangurenentzat

Berria

Ezustekoa eman eta bikote faboritoetako bati irabazi diote. Urrutikoetxea izan da partidako onena. Emakume Master Cupeko lau eta erdiko finala Miriam Arrillagak eta Amaia Aldaik jokatuko dute.

Alaveseko eta Valentziako jokalariak lehian, gaur. ©Jaizki Fontaneda / Foku

Alavesek eta Realak irabazi, Eibarrek berdindu

Paulo Ostolaza

Emaitza bikainak eskuratu dituzte gaur jokatu duten hiru euskal taldeek. Alavesek Valentziari irabazi dio (3-1), Realak Madrili (1-2), eta Eibarrek Huelvan berdindu du (1-1).

Realeko jokalariak burumakur, Real Madrilek bigarren gola sartu eta gero. ©JAVIER ETXEZARRETA / EFE

Biguntasuna ordaindu du

Ainara Arratibel Gascon

Lehen zati amaiera on baten ostean, Realak bi gol jaso ditu bigarren zatiaren hasieran, atzean gaizki zaindutako bi jokalditan. Ezin izan du suspertu. Txuri-urdinek hirugarren porrota kateatu dute

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.