BI AHOTSETARA

Iosu, Paxkal eta Peru

Gorka Erostarbe -

2019ko otsailak 10
Atzemanezinak baitira musikaren galbideak; baina batzuetan elkar topatzen dute. Eta atzemanezin bihurtzen dira topaketa horien lorratzak.

Duela bost urte inguru iritsi zen herrira Iosu; motibagarri zitzaion lagunartea topatu, eta Xukalden hartu zuen ostatu aurrena, Etxetxon hurrena. Eta segituan barreiatu zituen bizipoz, bizi kantu eta bizi harremanak auzoan, herriko hainbat gunetan. Erakutsi zigun aurreiritzirik ez izaten parekoarekiko, musikekiko... Umorea eta goxotasuna hurbileko ahaide izan daitezkela erakutsi zigun bezala, diskurtso hanpatuetatik urrun, egunerokoaren jardunez. Musika ulertzeko modu sentibera, alai eta ezohiko bat ere zabaldu du lau haizeetara harrezkero, Isuo ta Kezman edo Txost!-ekin. Urrutira ez, arrakasta gertura iristea dela agerraraziz.

Pare bat urte geroago heldu zen Peru. Beste herri batetik hura ere. Lagunartearen abarora hura ere. Harritu gintuen Santa Barbarako ermitan emandako kantaldi gogoangarriarekin, Hatxe alboan zuela pianoarekin; eta liluratu gintuen Zelai Ariztin ere, Laboaren omenezkoan. Auzo / herriko paisanajean ere ohiko bilakatu zen.

Azken udaz geroztik, Aginara bideko Etxetxon igaro ditu hilabeteak Paxkalek, Iosu bizikidetzat harturik. Hark izan du astirik gutxien herrian errotzeko, baina ez da geldirik egon orratio! Bospasei emanaldi ikus-entzun baitizkiogu tarte horretan, guztiak aski desberdin eta bereziak, gainera. Tartean, maitasun kantuen bertsioz osaturikoa taberna txiki batean, zinemarako konposaturiko musikaren entzunaldia areto handi baten iluntasunean, gaztetxean zuzenean egindako beste soinu banda bat... Zer ez!

Oraintsu irakurri diot Jordi Savall musikari eta musikologo katalan handiari: «Inoiz ez da kultura neurtu behar aberastasuna sortzeko duen gaitasunagatik».

Iosu, Paxkal eta Peru jada ez dira herrian; nork bere bidea hartu du. Musikari alderraiak dira, noranahikoak. Eta mukurutarrak; ez dute aberastasun (materialik) sortu. Baina eragin dute auzoan, eragin dute herrian. Musikatik abiatuta, musikarantz. Komunitate kritiko, alai eta gertuko baterantz. Hori aberastasun handia da.

Batzuetan topo egiten baitute musikarako bideek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna