Bi euskal ekintzaile bota ditu Marokok Mendebaldeko Saharatik

Arantxa Iraola -

2019ko urtarrilak 2
«Ongi etorri Marokora». Ostiralean heldu ziren Patricia Ibañez eta Irati Tobar euskal ekintzaileak Mendebaldeko Saharara, Aaiunera, eta berehala sentitu zuten Marokoko agintarien jazarpena; haien hitzetan eta ekintzetan. Hassanna Aalia ekintzaileren familiaren etxean hartu zuten ostatu bi andreek, eta hainbat keinuren bidez jakin zuten Polizia zelatan zutela. Astelehenean, berriz, alde egiteko agindu zieten; galdekatu egin zituzten, bilerak egiten aritzea leporatu zieten, eta taxi batean Marokora eraman zituzten: Agadirrera, hain justu ere.

Hantxe ziren atzo biak. «Ongi gaude», azaldu zuen Tobarrek. Beren kaxara joanak ziren biak Mendebaldeko Saharara, elkartasuna erakustera, eta hango egoera bertatik bertara ikustera. «Amorruz» hartu zuten bertatik alde egiteko agindua.