Albistea entzun

Euskal erako Donizetti bat

Gaetano Donizettiren 'La Fille du Régiment' egokitu bat taularatuko dute bihar Kursaalean. Elena Sancho-Pereg eta Xabier Anduaga lehen aldiz ariko dira elkarrekin oholtzan
Atzo arratsaldean egin zuten opera antzeztuaren entsegua. Irudian, entsegatzen.
Atzo arratsaldean egin zuten opera antzeztuaren entsegua. Irudian, entsegatzen. ANDONI CANELLADA/ FOKU Tamaina handiagoan ikusi

Leire Perlines Apalategi -

2022ko abuztuak 11 - Donostia

Donostiako Musika Hamabostaldiak opera antzeztua berreskuratuko du aurten, bi urtez egitarautik kanpo utzi ondoren. Gaetano Donizettiren La Fille du Régiment lana taularatuko dute, baina «Euskal Herrira egokituta». Bel cantoaren piezarik esanguratsuenetako bat da, eta Elena Sancho-Pereg sopranoak eta Xabier Anduaga tenorrak antzeztuko dute. Operaren bi emanaldi izango dira Kursaalean: bihar izango da lehena, eta igandean, bigarrena.

Guillermo Amaya eszena zuzendariak egokitu du obra. Testuingurutik atera eta XIX. mende hasierako Napoleonen Gerratik urruntzen den bertsio bat proposatu du, istorioa «Euskal Herrira hurbiltzeko asmoz». Elkarrizketak euskaraz eta gaztelaniaz izango dira, eta Tonio, protagonistetako bat, tiroldar mendizale gazte bat izan ordez, euskal mendizale gazte bat izango da. Jatorrizko bertsioan frantsesez emandako operaren zati kantatuak ere euskarara eta gaztelaniara itzuliko dira.

Pertsonaien arteko «komikotasuna» sustatuko duen ekintza eszeniko arin bat landu du Amayak, baina baita gerraren aurka egiten duena eta kritika soziala azaleratzen duena ere. Maitasun istorio bat da oraindik, nolanahi ere.

Eszena zuzendariak azaldu duenez, Donizettiren operak hiru ezaugarri berezi ditu: batetik, oso komedia «dibertigarria» dela; koruak «funtsezko» rola jokatzen duela —pertsonaia bat gehiago delako, finean—; eta, azkenik, elkarrizketek «garrantzi handia» dutela istorioaren garapenean.

Horrez gain, pertsonaia nagusien «saio ikusgarriak» ditu: Marie (sopranoa) eta Tonio (tenorra) dira. Elkar maite duten bi gazte dira, baina Mariek, une oro inguruan izango ditu Frantziako 21. erregimentuko gizonak; izan ere, haiekin hazitakoa da. Tonio, bestalde, armadan sartuko den gaztea da, eta Marieren eskua erregutuko die gainerakoei, haien onarpena lortu arte. Orduan abestuko du abeslariak bere Ah, mes amis aria aski ezaguna.

Donizettik 70 opera baino gehiago idatzi zituen; tragediak nahiz komediak landu zituen, eta horiek egin zuten ezagun bereziki konpositorea. Haren komedia ezagunen artean, bi italieraz dira (L'elisir d'amore eta Don Pasquale), eta bakarra da frantsesez: La Fille du Régiment, hain zuzen, 1840an Parisen estreinatu eta opera comique gisa idatzia izan zena.

Ibilbide luzeko gazteak

Elena Sancho-Pereg sopranoa eta Xabier Anduaga lehen aldiz ariko dira elkarrekin oholtzan. Sopranoak urteak daramatza etorkizun handiko nazioarteko ibilbidea egiten, eta liriko arinerako rolik adierazgarrienetako batzuk abestu ditu Europako antzoki nagusietan. Gainera, Rhineko Operako ahots ezagunetako bat da. Anduagaren ibilbideak ere etengabe egin du gora 2019an Operalia lehiaketa irabazi zuenetik, eta dagoeneko bel cantoari eskainitako opera tenplu eta jaialdi esanguratsuetan aritu da.

Sancho-Peregek aitortu du «erronka handia» dela opera taularatzea: «Komedia bat bada ere, musika oso bertutetsua dauka; oso zorrotza da, eta erronka handia izan da hain egun gutxitan musika zein eszena prestatu eta taularatzea. Atzo bertan, entseguan, ahots gora esan nuen txundituta nagoela nire kide guztien talentuarekin, bai eta nota guztiak zein azkar barneratu ditugun ikustearekin ere».

Bi abeslariek Euskadiko Orkestra eta Easo Abesbatza izango dituzte lagun oholtzan, beste hainbat abeslarirekin batera. Eta Lucas Macias izango dute zuzendari lanetan, azken 20 urteetan oboe bakarlari garrantzitsuenetako bat bezala ezaguna denak. Lehen aldiz arituko da lan horretan, ordea.

Haren lana goraipatu du Anduagak: «Lucas maisuaren lana nabarmendu nahi nuke, zati garrantzitsua baita niretzat. Bel cantoan oso garrantzitsuak gara abeslariak; baina, gidarik eta eramango gaituen norbait ez badugu, ezinezkoa dela uste dut; garrantzitsuena egiten dugunarekin gustura eta lasai sentitzea baita».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Nafarroako Orkestra Sinfonikoak Luis de Pabloren —argazkian, erdian— eta beste hainbat konpositoreren lanak interpretatuko ditu gaur. ©BERRIA

1972ko Iruñea harritu zuten doinuak akordura

Uxue Rey Gorraiz

Gaur hasiko dira 72-22 Topaketak Iruñean. Urriaren 18ra bitarte, eta orain dela 50 urtekoak gogoan, askotariko jarduerek eta emanaldiek artez jantziko dute hiria. Musika berebizikoa da gaur: Teresa Catalanen eta Tomas Marcoren solasaldi bat aurrena, eta Nafarroako Orkestra Sinfonikoaren kontzertua ondotik.
Moto- Membra Jesu Nostri obrako lan taldea: Pau Auli, Eneko Sagardoi, Lucia Astigarraga eta Andoni Sierra. ©OSKAR MATXIN EDESA / FOKU

Motoak eta gurutzeak

Iñigo Astiz

'Moto- Membra Jesu Nostri' kontzertu eszenifikatua estreinatuko du bihar Bilboko Arriaga antzokiak, Bieteritx Buxtehuderen musikarekin eta Eneko Sagardoik sortutako testuarekin
Kristof Arotzarena eta Aitziber Zugarramurdi, Zinegin festibalaren antolatzaileak, atzo, Baionan. ©GUILLAUME FAUVEAU

Zinegin festibala urriaren 20tik 23ra egingo dute, zenbait berritasunekin

Ainize Madariaga

Filmez gain, kontzertuak ere antolatu dituzte. Gaualdi «sataniko» sorpresa ere prestatu dute
Hertzainak taldeak joan den asten aurkeztu zituen amaierako kontzertuak. ©Monika del Valle / Foku

Hertzainak-ek beste kontzertu bat emango du BECen, abenduaren 17an

Mikel Lizarralde

Abenduaren 16ko emanaldirako sarrera guztiak amaitu dira dagoeneko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...