Noiz sortua: 2020-06-28 00:30:00

Eusko Jaurlaritzak amaitutzat jo ditu erietxeetako agerraldi berriak

Beste bi hildako eta hamalau positibo erregistratu dituzte Hegoaldean. Jaurlaritzak gripearen txertoaren kanpaina aurreratu nahi du

Aitor Biain -

2020ko ekainak 28

Nekane Murga Eusko Jaurlaritzako Osasun sailburuak jakinarazi du «kontrolatuta» dauzkatela azken egunetan izandako COVID-19aren agerraldiak, eta amaitutzat jo ditu aurreko astean Basurtuko (Bilbo) eta Txagorritxuko (Gasteiz) erietxeetan azaldutako fokuak ere. Pozik azaldu da agerraldi horien bilakaerarekin, baina zuhur jokatzeko eskatu du: «COVID-19a ez dago oporretan, eta arduraz jokatuta bakarrik egingo diogu aurre».

Izan ere, beste hamalau lagunek eman dute positibo PCR probekin azken orduetan Hego Euskal Herrian: zortzi kasu atzeman dira Nafarroan, hiru Araban, eta hiru Gipuzkoan. Hain zuzen, azken kasu horietako batek lotura izan dezake Orioko (Gipuzkoa) agerraldiarekin, eta Jaurlaritza harreman hori aztertzen ari da. Beste bi hildako erregistratu dira, halaber.

Ospitaleen egoera arinduz doa, nolanahi ere. Une honetan, zazpi pertsona daude ZIU zainketa intentsiboen unitatean Hegoaldeko erietxeetan, hau da, bezperan baino bi gutxiago; kopurua azken hiru hilabeteetako txikiena da. Osakidetzak herritarrei gogorarazi die, ordea, birusa ez hedatzeko segurtasun neurriak zorrotz bete behar direla lehen mailako arreta guneetan ere.

EAEn positibo eman dutenen erdiek 20 urte baino gutxiago dituzte. Azken egunetan gora egin du kutsatutako gazteen kopuruak, baina Murgak ez dio arreta berezirik jarri datu horri. Izan ere, esan du PCR probak egiten zaizkiela egun kutsatu baten senitarteko guztiei edo gertuko harremana izan dezaketenei, sintomarik izan ez arren, eta horregatik azaldu direla kasu horiek orain. Kezkatuta azaldu da udako jaietan gerta daitezkeen kutsatzeekin, kasu horien jarraipena egitea «ia ezinezkoa» litzakeelako.

Bestalde, txertoaren kanpaina urriaren hasierara aurreratzea aztertzen ari da Jaurlaritza. Izan ere, Murgak azaldu du gerta litekeela gripea eta koronabirusa aldi berean izatea, eta horrek COVID-19 kasuak goiz atzematea «zaildu» dezake haren hitzetan.

Bizkaiko egoitzak, garbi

Bizkaiko zahar etxeetan ez da COVID-19a duen gaixorik. Aldundiak jakinarazi du egoiliar bakarra dagoela gaixo, baina hura ospitaleratuta dagoela. Denera, positibo eman zuten 1.612 adinekok gainditu dute gaitza. Izurria hedatzen hasi zenetik 290 hildako zenbatu dituzte egoitzetan, eta beste 32 kasuren susmoa dute.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Udaletako eta Eusko Jaurlaritzako ordezkariak, Zumarragan bilduta. ©/ Ordiziako Udala

Ordiziako fokuan 35 pertsona kutsatu dira oraingoz, eta alkateak «autokonfinatzeko» eskatu du

Irati Urdalleta Lete - Jon Ordoñez Garmendia

Beste hemeretzi positibo daudela jakinarazi du Osasun Sailak, eta dagoeneko mila PCR baino gehiagoren emaitzak jaso dituzte. Alkateak "kutsatze komunitario bat" dagoela esan du.Murgak baztertu egin du konfinamendua ezartzea, baita joan-etorriak mugatzea ere. Itxi zituzten Haka, Miami eta Kebab tabernetako zerbitzariek negatibo eman dute. Biharko azoka bertan behera utzi du Udalak, eta kiroldegia, jolas parkeak eta liburutegia itxi ditu.

Jair Bolsonaro. ©Joedson Alves / EFE

Bolsonarok positibo eman du COVID-19an

Oihane Puertas Ramirez

«Bikain» dagoela adierazi du Brasilgo presidenteak. Hura izan da COVID-19aren eragina ukatu izan duten agintarietako bat, eta horrek ekarri du Brasil herrialde kutsatuenetako bat izatea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna