Noiz sortua: 2018-08-26 00:30:00

Milaka hazi, loratzeko

Jendetza batu da Iruñean, Maravillas gaztetxearen aldeko manifestazioan. «Kontrabotere guneen beharra» azpimarratu dute protestaren antolatzaileek

Milaka pertsona elkartu ziren Gazteluko plazan, manifestazioaren bukaeran.
Milaka pertsona elkartu ziren Gazteluko plazan, manifestazioaren bukaeran. JAGOBA MANTEROLA / FOKU Tamaina handiagoan ikusi

Ion Orzaiz -

2018ko abuztuak 26

«Lore bat moztu nahi zuten, baina ehunka hazi gara», abestu zuten Gazteluko plazako kioskotik, jendetza hurbildu ahala. Izan ere, Maravillas gaztetxeak indar erakustaldia egin zuen atzo Iruñean. Ehunka ez, milaka lagun batu ziren espazio autogestionatuen eta okupazioaren aldeko manifestaziora, eta, Iruñeko Alde Zaharrean ez ezik, gaztetxeen mugimenduak Euskal Herri osoan ere sustrai sakonak dituela frogatu zuten.

Manifestazioa hasi baino hamar minutu lehenago heldu ziren gaztetxeko kideak autobus geltoki zaharrera, ingurumarietan zain zirenen txaloen artean. Han zen 89 urteko Josefina Lamberto ere, gaztetxeari izena ematen dion Maravillas Lambertoren ahizpa. «Nola ez naiz ba etorriko? Asko maite ditut nire gazte hauek. Gogotsu nago, sasoiko, eta nire esku dagoen guztia eginen dut haien alde», adierazi zion BERRIAri. Gaztetxeari Maravillas izena jarri izanak «poz handia» ematen diola gaineratu zuen, «82 urteko isiltasunaren ostean, gaztetxo hauek izan direlako gure ahizparen mezua zabaldu dutenak». Horregatik, gaztetxeko kideekin «hitz egitera eta gauzak konpontzera» premiatu zuen Nafarroako Gobernua, «interes propioen gainetik».

18:00. Autobus geltokiaren inguruko kaleak, borborka. Gazteak, gehientsuenak, baina baita adinekoak ere, seme-alaba edota bilobekin. Kolore askotariko pankartak eta aldarrikapenak ere ikus zitezkeen: AHTaren kontrako taldeenak, LGTBI mugimenduarena, etxe kaleratzeen aurkakoa, mugimendu feministarena eta 1978ko Sanferminak Gogoan plataformarena, besteak beste. Atzokoan, gazteen aldarriekin bat egin zuten denek.

Txaloka eta «Maravillas aurrera!» oihukatuz abiatu zen manifestazioa, Oliveto kondearen kalean gora, pankartaren aurrean zihoazen joaldunek ezarritako erritmo bizian. Atzean, mila koloreko jende-ilara zalapartatsua. Festa giroan egin zuten ibilbide osoa gaztetxearen aldekoek: joaldunez gainera, Alde Zaharreko erraldoi eta buruhandien konpartsak, malabaristek, hankapaluek eta gaiteroek girotu zuten protesta.

Askotariko leloak ere entzun ziren hasieratik bukaerara, baina «Maravillasetik ez dira pasako», «Gaztetxea aurrera» eta «Borroka da bide bakarra» izan ziren gehien errepikatu zituztenak.

Vianako printzearen plaza zeharkatu ostean, San Inazio etorbidean gora abiatu ziren manifestariak; eta handik, Karlos III etorbidera, Gazteluko plazan bukatu arte. Manifestazioaren bukaeran, plaza erdia betetzen zuen jendetzak.

Han, musikak eta jai giroak ez zuten etenik izan: bozgorailuetatik Fermin Valentziaren Maravillas kantua jarrita egin zieten harrera manifestariei, eta horren ostean, Idoia Tapia eta Siobhan Grady musikariek gaztetxearen omenez propio sortutako Florecica de Nabarreria abestia eskaini zuten zuzenean.

«Ez gaituzte geldituko»

Musika emanaldien ostean, Maravillas gaztetxeko asanbladaren izenean hitz egin zuten Uxue Jimenezek eta Ulises Domechek. Biziki hunkituta, eskerrak eman zizkieten manifestaziora batutako guztiei, baina, bereziki, Josefina Lambertori. Gaztetxearen alde erakutsi duen kuraia nabarmendu zuten: «Eredu zaitugu». Gogoan izan zuten, halaber, Hendaiako gaztetxe berria.

Hitzaldian, gazteek nabarmendu zuten autogestioa oinarri duen espazio eta proiektuekin aurrera jarraitzeko asmoa dutela. Ezinbesteko jotzen dituzte «kontrabotererako espazioak».

Bestalde, azken egunetan okupazioaren eta gaztetxearen kontra esandakoak gezurtatu nahi izan zituzten Jimenezek eta Domechek: «Ondasun publiko bat pribatizatzea leporatzen digute, baina hogei urte hutsik zeramatzan espazio publiko bati erabilera komunitarioa ematea ez da sekula pribatizatzea izanen. Ez gaitzatela engaina: Maravillas gaztetxearen ateak beti egon dira edonorentzat zabalik». Gaztetxean zabaldu dituzten liburutegia, elikagai bankua, gimnasioa eta ikastegia ere nabarmendu zituzten, eta bide hori urratzen segitzeko asmoa dutela ohartarazi zuten: «Ez gaituzte geldituko».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Apirilaren 3an eguneratua, 14:00etan. ©BERRIA

Koronabirusaren azken datuak

Berria

Euskal Herrian 10.686 gaixok eman dute positibo koronabirusaren proba eginda. 597 hil dira. COVID-19 gaitza izandako 2.736 pertsonari eman diete alta. Grafikoak, albiste barruan.

Kale garbitzaile bat, Donostian. / ©Jagoba Manterola, Foku

Konfinamendua apirilaren 26ra arte luzatuko du Espainiako Gobernuak

Berria

El Pais egunkariak eta TVEk baieztatu dutenez Pedro Sanchezek apirilaren 26ra arte luzatu du konfinamendua. Goizean bildu da Sanchez batzorde zientifikoarekin eta arratsaldean egingo du agerraldia. 

Ikurrina bat, Durangoko balkoi batean koronabirusak hildakoak gogoratzeko. / ©Raul Bogajo, Foku

Aberri Eguna balkoietan ospatzera deitu dute hainbat pertsona ezagunek

Jon Ordoñez Garmendia

Ikurrinak jartzeko eta ordu jakin batean euskal irratietan emango den abesti bat kantatzera deitu dute. Osasun krisian bizia galdu dutenak gogoratu, dolua adierazi eta zaintzan dabiltzanei eskerrak emateko baliatu nahi dute. (ikusi nortzuk diren sustatzaileak, albistean).

Iñigo Urkullu artxiboko irudi batean. ©Juanan Ruiz, FOKU

Urkullu: «Dena ematen ari gara egoera honetatik atera eta normaltasunera itzultzeko»

Ainhoa Larretxea Agirre

Azken egunetako bilakaera positiboa izaten ari den arren etxean gelditzeko beharra azpimarratu du Urkulluk. Bere dolumina helarazi die azken egunetan hurbilekoren bat galdu duten herritarrei. 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna