Albistea entzun

EBko estatuetan asiloa eskatzeko eskubidea debekatu nahi du Austriak

2025etik aurrera asiloa soilik blokearen «balioak eta oinarrizko eskubideak errespetatzen» dituztenek lortu dezatela nahi du Vienak. «Gogoetarako ideia bat» dela adierazi du gobernuak
Hainbat migratzaile Austriaren eta Esloveniaren arteko mugan, artxiboko irudi batean.
Hainbat migratzaile Austriaren eta Esloveniaren arteko mugan, artxiboko irudi batean. AKOS TERBA0 / EFE Tamaina handiagoan ikusi

Ander Perez Zala -

2018ko uztailak 8

Hil honetatik urte bukaerara arte, Austria izango da EB Europako Batasuneko Kontseiluko presidentea. Sei hilabetean behin aldatzen dute karguduna, eta Vienari egokitu zaio aurtengo bigarren seihilekoan presidente izatea. Bada, Sebastian Kurz Austriako kantzilerrak aste honetan jakinarazi du, Europako Parlamentuan, Austriak «aldaketa pragmatiko bat» lortu nahiko duela migrazioaren auzian bere presidentetzak iraun bitartean: «Migrazio politika aldatu behar dugu, eta arreta jarri kanpo mugak babestean». Hitzak utzi eta ekiteko garaia heldu dela uste du Kurzek, eta gainontzeko estatu kideei balizko lehen neurriak helarazi dizkie jada: EBko estatuetan asiloa eskatzeko eskubidea debekatzea proposatu die, horiek EBko mugetatik kanpo egin daitezen.

Austriako Gobernuak, eskuinaren eta eskuin muturraren arteko koalizioak, uste du «EBk eta elite politikoek egoeraren kontrola galdu» dutela, eta, beraz, «aldaketa bat» behar dela asilo politikan. Horregatik, Vienarentzat irtenbidea da asilo eskariak «EBko lurretan ez prozesatzea», eta asiloa soilik blokearen «balioak eta oinarrizko eskubideak errespetatzen» dituztenei ematea, baina soilik 2025etik aurrera. Beraz, estatu kideek hautatu beharko lukete, EBtik kanpo dauden zentroetan, nori eta zenbati eskaini babesa, betiere baldintza hori kontuan harturik. Hori da Kurzen gobernuaren plana, nahiz eta errefuxiatuen estatusari buruzko Genevako Hitzarmenaren aurka doan asiloa eskatzeko eskubidea kentzea.

Austriako Profil astekariak atzo filtratu zuen dokumentuaren edukia, eta handik ordu gutxira baieztatu zuen Austriako Gobernuak zabaldutako informazioa. «Gogoetarako ideia bat da», esan zuen Peter Launsky-Tieffenthal gobernuko bozeramaileak, proposamenari garrantzia kendu nahian, eta baieztatu zuen eskuin muturreko Herbert Kickl buru duen Barne Ministeriotik datorrela ideia.

Testuak ez die aipamenik egiten Europar Kontseiluak ekain bukaerako bileran adosturiko neurriei. Hala ere, Vienak arreta jartzen dio EBko kanpo mugen atarian zentroak sortu beharrari, asilo eskariak han prozesatu behar direlakoan. Jarrera hori Visegradeko taldea osatzen duten lau herrialdeek ere babesten dute —Poloniak, Hungariak, Txekiak eta Eslovakiak—, eta Italia jarrera horretara hurbiltzen hasi da Lega eta 5 Izar Mugimenduaren koalizioa boterera iritsi denetik.

Ideiak ideia, hilabeteotan Austriak argi utzi du migrazioaren auziari aurre egiteko nahiago duela arreta ezarri EBren kanpo mugetan, eta, beraz, helburu horrekin bat egiten du estatu kideei egin dien proposamenak. Urteotan, Alemaniako kantziler Angela Merkelen jarrerak, mugak irekiak mantentzearenak, hartu die aurrea gainontzekoei, baina joera aldatzen ari da pixkanaka, eta Kurz ari da migrazio politika berrien buruzagitza hartzen. Oraindik, ordea, zatiketa handia dago 28 estatu kideen artean.

Kontinente zaharrean ez ezik, etxean ere joera bereko neurriak bultzatu ditu Kurzek. Joan den ostegunean, Austriako Parlamentuak Immigrazio Legeari aurkezturiko zuzenketa bat onartu zuen, eta, aldaketa horren ondorioz, errefuxiatuei muga gehiago ezarri dizkiete: besteak beste, asilo eskatzaileei 840 euro kobratuko dizkiete euren eskarien tramiteak finantzatzeko.

Mugak ez dira «seguruak»

Asiloari loturiko neurriei buruzko iritzia emateaz gain, Vienak uste du Schengen eremuaren kanpo mugak «ez direla seguruak». Egun, Kanpo Mugak Zaintzeko Europako Agentziako 3.000 agentek zaintzen dituzte muga horiek, baina, hemendik gutxira, 10.000ra igoko da kopuru hori.

Europako Batzordeak 2027rako nahi zuen gorakada, baina, egungo egoera eta estatu kide batzuen eskariak kontuan hartu ostean, aldaketa 2020ra aurreratu nahi du Jean-Claude Juncker Europako Batzordeko presidenteak. Iragarri duenez, irailean aurkeztuko du data aldaketa horri begirako lehen proposamena.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Vladimir Saldo (Kherson), Jevgeni Balitski (Zaporizhia), Vladimir Putin, Denis Puxilin (Donetsk) eta Leonid Pasetxnik (Luhansk), atzo, Kremlinen. ©GRIGORY SISOEV / EFE

Gerran jarraitzeko erabakiak

Igor Susaeta

Errusiak Ukrainan okupatutako lurrak anexionatzeko hitzarmenak sinatu ditu Putinek. Zelenskik iragarri du NATOn sartzeko eskaera egingo dutela, horretarako urgentziazko prozedura erabiliz
Bi manifestari, Espainiako Poliziaren aurrean, Bartzelonan, 2019ko urrian. ©ENRIC FONTCUBERTA / EFE

Berriz ausartu ez daitezen

Gorka Berasategi Otamend

Espainia milaka herritarri jazarri zaie Katalunian 2017ko erreferendumaz geroztik. Omniumen arabera, 4.200dik gora dira. Independentisten helburua da «errepresioa konpromiso bihurtzea».
Pere Aragones, Kataluniako Parlamentuan, lehen aldiz Jordi Puignero presidenteordea aldamenean izan gabe. ©EFE

Koalizio gobernuak jarraitzea «lehentasun bat» da Aragonesentzat

Mikel Elkoroberezibar Beloki

«Egoera konpontzeko garaia da», JxCren arabera. Aragonesek «ahalik eta azkarren» aritzeko eskatu dio JxCri politika orokorreko eztabaidan
 ©BERRIA

«Leku estrategikoa da Kurdistan, eta hori da haien madarikazioa»

Mikel Elkoroberezibar Beloki

Kurdistan «liztor habia berezi eta korapilatsua» da, eta, hango gatazka ulertarazi nahian, liburu bat idatzi du Urtzi Urrutikoetxeak: 'Kurdistan. Argi bat Ekialde Hurbilean'. «Utopia» ezagutzeko bide bat ere bada.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...