Albistea entzun

Milaka hungariarrek harrotasunez salatu dute Orbanen lege homofoboa

LGTBI kolektiboaren kontrako «kanpaina» gaitzetsi dute. Gobernua Hungariako gizartea «zatitzen» ari da, manifestarien iritziz. Lehen ministroaren jokabidea datorren urteko bozekin lotu dute
Milaka manifestari sexu eta genero askatasunaren aldeko Budapest Harro martxan, atzo, Hungariako hiriburuko erdigunean.
Milaka manifestari sexu eta genero askatasunaren aldeko Budapest Harro martxan, atzo, Hungariako hiriburuko erdigunean. ZOLTAN BALOGH / EFE Tamaina handiagoan ikusi

Gorka Berasategi Otamendi -

2021eko uztailak 25

«Festa» eta «protesta» batu nahi zituzten Hungarian Budapest Harro martxaren antolatzaileek, bereziki Viktor Orban herrialdeko lehen ministroak sustatu duen azken lege homofoboari eta transfoboari erantzuteko. Hala egin zuten. Festa giroan zeharkatu zituzten Budapest erdiguneko kaleak milaka lagunek, musikak lagunduta, dantzan, manifestazio koloretsuan. Bestalde, Orbanen azken lege polemikoaren kontrako mezu argia eman zuten. Martxan parte hartzeko bultzada berezi bat sentitu zuten askok, Hungariako Gobernuak LGTBI kolektiboaren kontra «abian duen kanpaina» salatzeko. «Haserre handia dago gizartean gertatzen ari denarengatik», Johanna Majercsik martxaren antolatzaileetako baten esanetan.

Hungariako Parlamentuak LGTBI kolektiboa baztertzen duen lege bat onartu zuen joan den ekainean, Orbanen Fidesz alderdiaren botoekin. Neurriak debekatu egin du eskoletan homosexualitatearekin eta sexu aldaketarekin lotutako edukiak lantzea. Telebistan ere ezin izango dira gai horiek jorratzen dituzten saioak eta iragarkiak eman egunez eta gaueko lehen orduetan. Gobernuaren esanetan, haurrak «LGTBI ekintzaileen sexu propagandatik babesteko» bultzatu du.

Helburu horretatik urrun dagoela uste du Europako Batzordeak. Neurriak Europako Batasunaren oinarrizko printzipioak urratzen dituela adierazi du, eta, horregatik, aurreko astean arau hausteen prozedura bat hasi zuen Hungariaren kontra. Prozedura horrek EBko Justizia Auzitegian amai dezake, eta, hala gertatuz gero, Europako diru laguntzak etengo lizkiokeen zigor bat jasotzeko arriskuan legoke Orbanen gobernua.

Lehen ministroak atzo esan zuen baztertu egingo duela pandemiatik suspertzeko diru laguntza, Bruselak trukean LGTBI kolektiboaren kontrako legea erretiratzeko eskatu behar badio. Bestalde, Europaren presioari aurre egin nahian, legeari buruzko erreferendum bat egingo duela adierazi zuen Orbanek, joan den asteazkenean. Galdeketa urte amaieran edo 2022 hasieran izango dela zehaztu zuen gobernuak.

Eztabaida «artifiziala»

Hungariako agintarien jarrera gizartea «zatitzen» ari dela ohartarazi du Balint Bertarrek, martxan zihoala. «Herrialdea suntsitu» dezakeen eztabaida «artifizial» bat piztea egotzi dio Boglarka Balazsek gobernuari. Haren iritziz, Orbanen hauteskunde interesak daude erabakiaren atzean.

Uste zabaldua da hori lege polemikoaren kontra daudenen artean. Bat dator Mate Deniel Szabo Askatasun Zibilen Hungariako Batasuneko kidea ere. Szaboren arabera, Fidesz alderdiak migrazioaren kontrako mezu gogorrei esker lortu du arrakasta azken bozetan, baina orain diskurtso horrek ez du lehen besteko pisua, eta Orbanek «gorrotatzeko talde berri bat behar du».

Lehia estua iragarri dute inkestek 2022ko bozetarako. Jokaleku horretan, lehen ministroak LGTBI kolektiboaren kontrako neurriekin nabarmendu nahi du, bere burua balio kristau eta kontserbadoreen defendatzaile sutsuenaren modura aurkeztuta.

Hungariak homosexualitateari eta genero aldaketari buruzko gaiak eskoletatik kanpo uzteak haurrengan izan ditzakeen ondorioengatik kezkatuta agertu da Rene van Hell Alemaniak Budapesten duen enbaxadorea manifestazioan. «Garrantzitsua da LGTBI haurrek eredu positiboak izatea, beren garapenerako eta hungariar izateaz harro egon daitezen».

Orbanek boterean segitzen badu herrialdea uzteko aukera «aztertu» beharko duela uste du Majercsikek. Homofoboak ahaldunduta dabiltzala nabarmendu du.

Eskoletako debekuaren aurretik, lege homofobo eta transfobo gehiago onartu ditu Hungariak. Iazko maiatzean, jaiotzatik egokitutako sexua aldatzeko aukera debekatu zuen. Abenduan, sexu bereko bikoteei haurrak adoptatzea eragotzi zien, legez.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Espainiak Kataluniako bederatzi buruzagi independentistari eman dien indultuaren kontrako manifestazio bat, ekainaren 11an, Bartzelonan. ©Quique García, EFE

Espainiako Auzitegi Gorenak baztertu egin du indultuen kontrako bide penala

Gorka Berasategi Otamendi

Eskuin Liberala alderdiak Pedro Sanchezen kontra jarri zuen kereila bertan behera utzi du epaimahaiak. Azaldu duenez, soilik bide administratibotik jo daiteke Kataluniako buruzagi independentistei zigorra eteteko erabakiaren aurka.

Pekin, behe laino batek estalia, artxiboko irudi batean. ©ROMAN PILIPEY / EFE

OMEk gomendatu du kutsatzaile nagusiei muga zorrotzagoak jartzeko

Arantxa Elizegi Egilegor Iosu Alberdi

Esan du kutsadurarekin lotutako heriotza gehienak saihestu daitezkeela neurriak betez gero

Copernicusek sareetan zabaldutako mapa. ©@CopernicusEU

Litekeena da Kanarietako sumendiak jariatzen dituen gasak Euskal Herrira heltzea asteburuan

Jone Arruabarrena

Sufre dioxido kopuru handiak isuri ditu sumendiak: eguneko 7.997-10.665 tona. Ostiralerako, gas hori Iberiar penintsulako zati handi batean barreiatuko da, baita Marokon, Tunisian, Frantzian eta Italian ere, besteak beste.

Estatu kolpearen egunetan hildakoen senideak, justizia eske, La Pazen. ©MARTIN ALIPAZ / EFE

«Kolpearen lehen biktima da Sebastian»

Romina Lema

Boliviako estatu kolpearen berri ematen ari zela, Sebastian Moro kazetaria hilik agertu zen, La Paz hiriburuan. Familiak Normando Alvarez Garcia Argentinaren enbaxadore izandakoaren aurka jo du, Morori laguntza ukatzea egotzita.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Egin BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna