EHZ berritua ekaineko azken asteburuan egingo dute

EHZ jaialdiaren geroa bere gain hartu duen lantalde berriak proiektuaren proposamen berria aurkeztu zuen atzo, Baionako Zizpa gaztetxean; 60 inguru pertsona elkartu ziren bertan, eta gehiengoak babestu zuen proiektua. Belaunaldi berriak sortzeko «tresna» gisa definitu zuten jaialdi berriaren proiektua. Norabide berria marraztuta eta onartuta, orain, bost hilabete gelditzen zaizkie paperean jasotako hori konkretuki gauzatzeko.

Ekaitzek eta zulo ekonomikoek markatutako bi urteko trantsizioaren ondoren, 1996an jaiotako festibala eraberritu egingo da aurten, eta ekainaren 28tik 30era egingo dute. Gidaritza taldearen iritziz, aurtengo edizioak «mugarria» izan behar du. Eta datozen bost hilabeteetan Ipar Euskal Herriko gazteria «ukitu» nahi dute, «eskualdez eskualde, eragilez eragile eta ikastetxez ikastetxe».

Oraino badute zer zehaztu. Atzoko bilkuran hasi ziren lantaldeak antolatzen, gaiak eta egituraketa zehaztuz joateko. Aurrekontua ez da oraino arras definitua, ez eta lekua atzemana. Halere, proiektu berria «herri batera» ekartzeko parioa egin nahi dute, herriak eskainitako guneak erabiliz.

Gidaritza taldearen proiektuak dioenez, EHZk «borroka eremua indartuko duen tresna izan behar du eragile eta elkarte ezberdinetan ari diren gazteentzat». EHZren «eskaintza politikoa gazte eta herri mugimenduen beharren araberakoa» izatea nahi dute. Argi utzi dutenez, «EHZk ez du zama izan behar».

EHZk bultzatu beharreko kultur ereduari dagokionez, «hegemonikoa den kulturaz besteko proposamenak» aintzat hartu eta haiei bultzada emateko asmoekin daude. Gazteek, bereziki, «bertako kultura herrikoiaren aldeko apustua» egin nahi dute, «proiektuaren balioekin bat egiten duten artistak lehenetsiz».

Zubiak eraikitzen

EHZko kultur eskaintza «proiektuaren parte izan nahi duten artistekin elkarlanean» osatuko dela esplikatu dute sustatzaileek, eta kultur eskaintzaren eta eduki politikoaren artean «zubiak» eraikitzen saiatuko direla. Kontzertuak publikoa «eduki politikora eta kultur eskaintza alternatibora hurbiltzeko pizgarri gisa» ikusten dituzte.

Jaialdiaren lehen egunean «ilusioa transmititzea» eta kontzertuak antolatzea aurreikusten dute. Bigarrenean, larunbatarekin, goizetik, tailerrak, «eduki politikoa lantzeko», eta kultur eskaintzak; gauean, berriz, ekitaldia eta berriz ere kontzertuak. Eta iganderako herri bazkaria pentsatua dute, familiak erakartzeko asmoz, belaunaldien arteko nahasketa bultzatuz.